معـــــركة الصـــريــــف 1901

بسم الله الرحمن الرحيم

اخواني


حينما نذكر وقعة الصريف فإننا نتطرق لأحد ابرز واشهر واقوى المعارك التي حدثت في نجد !! وفي الواقع ؛ لااظن ان احدا ً من اهل حايل او من شمّر او من اي قبيلة اخرى يجهل احداث هذهـ المعركة ،،،فبعد وفاة الامير محمد العبدالله ال رشيد رحمه الله ..تولى الحكم الامير عبد العزيز بن متعب ال رشيد(( الجنازه )) وقد كان نفوذ حكم ال رشيد وصل الى حدود الاحساء وحدود الحجاز وكان يشمل القصيم والجوف والرياض اما عاصمته فحائل ، والى الجنوب امتد الى ان وصل الى مايقارب 170 كم دون نجران ،،،

وكانت المعركة سنة 1901 م


وقد اقام حاكم الكويت الشيخ مبارك الصباح معاهده سريه مع الانجليز دون علم الدوله العثمانيه وقتها !!

اسباب معركة الصريف :-

1) - رغبة الشيخ مبارك السيطرة على نجد .
2) - أراد الشيخ مبارك والإنجليز أن يقلل من هيبة ونفوذ آل رشيد في الجزيرة .
3) - تأييد بعض أهالي القصيم للشيخ مبارك .
4) - رغبة الشيخ مبارك بالقضاء على إمارة الرشيد وكذلك رغبته بالقبض على يوسف آل إبراهيم .
5) - الإعتدائات على قبائل الطرفين .
6) - قيام الشيخ مبارك بقتل جماعة من تجار حايل خفية وهم خارجين من الكويت .

إستعدادات الجيشين:-

جيش حايل بقيادة الأمير عبدالعزيز بن متعب وأغلب الجيش من قبيلة شمر، وكذلك هناك فرقة مشتركة بالجيش من أهل الرياض بقيادة الشيخ عبدالملك بن عبدالله بن عبداللطيف آل الشيخ( من أحفاد الشيخ محمد بن عبدالوهاب) وكان الجيش ليس بالكثير مقارنة بجيش ابن صباح ،،،

أرسل الأمير عبدالعزيز الرشيد مبعوثين لقاسم بن ثاني أمير قطر يطلب الدعم ، ليتزود من ميناء قطر من العثمانين بالأسلحة ، ولكن فشل في ذلك فقد قبض مبارك الصباح على المبعوثين وعرف خطة الجنازة في كيفية الدعم ، ففشلت خطته ، فقد كان موقفه صعب إذ أن موانيء الكويت وقطر مغلقة بوجهه ، والطريق إلى العراق غير آمن .
ولكن بدأ الإستعداد دون معونة أحد معتمداً على الله ثم على أهالي حايل ..

جيش الكويت بقيادة الشيخ مبارك بن صباح وكان قد قام حلف بين الشيخ مبارك والكثير من القبائل للقضاء على دولة آل رشيد، واختلف في عدد الجيش فقيل 10000آلاف وقيل 13000ألف وقيل 30000ألف.. وكان الجيش يضم الأمير عبدالرحمن بن فيصل وابنه عبدالعزيز وكذلك أمراء بريده آل مهنا وأمراء عنيزة أل سليم، وقد تزود هذا الجيش بالأسلحة من الإنجليز وهي حوالي 5000 بارود ، أما القبائل المشتركة فهي 1- مبارك الصباح ومعه 700 من أهل مدينة الكويت


2- ال سليم أمراء عنيزة
3- أل مهنا أمراء بريدة
4- قبائل الظفير ورؤسائهم جعيلان بن سوسط وهزاع بن سويط
وخالد بن غيلان بن سويط وحمدان بن ضويحي ومناور بن هضبان
5- مطير ورئيسهم سلطان بن فيصل الدويش ونايف بن بصيص
6- العجمان ورئيسهم محمد بن حثلين
7- بنو هاجر ورئيسهم ابن شافي
8- أل مرة ورئيسهم ابن منيخر
9- سبيع بقيادة ظرمان ابو ثنين
10- السهول رئيسهم جلعود
11- قحطان رئيسهم حشربن وريك
12- الجبلان رئيسهم صاهود بن لامى
13- العوازم رئيسهم مبارك بن دريع
14- الرشايدة رئيسهم محمد بن قرينس
15- عتيبة رئيسهم الشيباني
16- ألامام عبد الرحمن الفيصل وابنه عبد العزيز
17- قبائل المنتفق ورئيسهم سعدون باشا
18- الرولة
:-
وعدد كبير وجموع من البدو اللي اشتركوا طمعاً بالغنائم .
ويقول الشاعر العزي ابن عبيد (راعي البره) عن جيش ابن صباح:-
من كل غواص وسيـب يجيبـه
وباللي يحدقون السمك زام حراب
وعريب الدار وكل من يلتجي به
وراع النفاق ومارج الدين ماغاب
وجموعة العجمان ولـي حظيبـه
مع الدويش واتلاهـم والأجنـاب
والمنتفق وإبـن شريـم ونسبيـه
وسكانت النقرة وسالم وغصـاب
خطة مبارك الصباح:-
قام الشيخ مبارك بوضع خطة للسيطرة على نجد والقضاء على إمارة الرشيد ، وكانت الخطة أن يتجه عبدالعزيز بن عبدالرحمن آل سعود إلى الرياض ، وأن يتجه آل مهنا إلى بريده وآل سليم إلى عنيزه ، وأما باقي الجيش يقاتل جيش آل رشيد . عندما وصل الجيش إلى روضة التنهات توجه عبدالعزيز آل سعود بألف رجل لفتح الرياض وحاصر الرياض 55 يوم يقول عبدالله فلبي(( أن عبدالعزيز اقتحم فعلاً أسوار الرياض ، ولكن أهلها التفوا حول أميرهم، وقاتلوا قتال المستميت ، حتى كسر اصبع عبدالعزيز)) وكان من أكثر المدافعين عن المدينة الشيخ محمد بن عبدالله بن عبداللطيف آل شيخ مما جعل عجلان أن يهدي الشيخ فرس ، وعندما كان الملك محاصر للرياض أتاه رسول من والده يخبره بهزيمة الجيش ويأمره بالعودة إلى الكويت . آل مهنا وآل سليم فقد نجحوا في دخول بريده وعنيزه !!!

ليلة المعركة وصباحها:-
كان الأمير عبدالعزيز قد خيم في الصريف، وأما الشيـخ مبارك فقد خيم في الطرفية. في يوم 25 ذي القعدة وفي الليل اجتمع مبارك مع شيوخ وكبار القبائل يشاورهم بشأن الحرب ضد الرشيد.وكان مع ابن صباح ( 27بيرق ) وارسل ألف مقاتل مع عبد العزيز بن سعود إلى الرياض وقال ابن صباح أنا معي قوة ما تقهر ونا ماقدّامي إلا
ّ شمر وبجيب ابن رشيد وبوقعه على بياض وابي اذله وابقضى على دولة شمر وأيدوه الموجودين !!؟
وقال له العزي راع البره يقال انه من عتيبه . ,ويقال انه من مطير. هل تعرف ابن رشيد؟؟؟؟ قال ابن صباح ( أنا ما اعرفه اعرف عمه وآلا هو حكم من سنتين وهو شر وشرير وش يصير؟؟ قال العزي:::: يصير شي كثير لا تتعب نفسك وترسل له المراسيل تراه هو يدور عليك تراه وصلك اليوم ولا الليلة ولا ّباكر حط حراس لا يغرك المنافقين ترا ما فيهم إلا ّ من انكوا بناره وقام ابن صباح وثار عليه وقال وش ها الصباح الأقشر ) ) !!؟كان جيش مبارك الصباح متوقعين النصر وذلك لكثرة العدد والعدة، وكان الأمير عبدالعزيز الجنازه
يريد تأخير المعركة إلى اليوم التالي ، ونصحه رجل بأن يسرع بالهجوم وقال :
مبارك اليوم ما له عز ولاسعه لأن البارحه ذكرى تاريخ ذبحته لأخويه محمد وجراح ...

وصف معركة الصريف:-
بدا جيش حايل يعرضون ، ويوم انتهوا من العرضه قام كل واحد يودع أخوه... هاجم عدد من الفرسان جيش ابن صباح
ولكن واجههم البوارديه وبدوا بإطلاق النار عليهم فرجعوا، وأمر الأمير عبدالعزيز بأن تساق 40 ناقة من (ذروات) (نياق ال رشيد) ويكون الجيش من خلفهم وقد قتل في بداية المعركه ابناء حمود العبيد ال رشيد (سالم ومهنا )رحمهم الله..
.. وكان الأمير عبدالعزيز متعصب بعصابة حمراء ومعه رافع البيرق ومن حوله عدد من أسرة آل رشيد .ويوم بدأت المعركة وتقهقر جيش ابن صباح ، فهج ّ الكثير من الجيش وخاصةً البدو. ولم تستمر المعركة كثيراً حيث أن جيش ابن صباح انكسر بعد فرار الكثير من الجيش ، فانهزم الجيش هزيمه نكراء . وغنمت شمر الكثير من الغنائم.. ولدرجة ثقة جيش ابن صباح بالنصر كان غدائهم بالقدور جاهز . وللعلم أن اابن صباح حين خروجه قال للطباخين ( نبي ناصلهم وننهيهم زينو الغدا نبي نتغدا بهذا ماحنا مبطين) وهذا بسبب تيقن ابن صباح كسب المعركة لكثرة البيارق معه !!؟
وتفاجأ الطبابيخ بدخول ابن رشيد ومن معه عليهم ليتغدو غدا ابن صباح
وأبن صباح هذا هو الوحيد اللي تبقى من الصباح وما الصباح الحاليين إلا احفاده .. فر شيوخ القبايل كلهم وكلن رجع إلى ديرته ، وفر الشيخ مبارك هو وامراته إلى سدير وبالتحديد إلى الزلفي ، وركب بعير وتوجه نحو الكويت
. ويرد مبارك هزيمته إلى البدو المرافقين له الذين انقلبوا عليه ونهبوا رجاله. ويروي مبارك بأن شيخ بريدة قد وصل في 400 فارس بعد أن انجلت المعركة، وأن ابن رشيد لاحقه، وشتت رجاله، وقتله، وفرض على بريدة 30000 ريال غرامة. ويدعي مبارك بأنه خسر حوالي 2000 من رجاله منهم حمود أخو الشيخ،
وخليفة بن عبد الله الصباح ابن أخيه، بينما يقدر خسارة ابن رشيد بأربعمائة قتيل.
وهذه امرأه كويتيه في الكويت وصلها خبر الهزيمة من قرينيس واحد من عبيد الصباح ، وأصبحت كل الكويت أحزان فكان كل بيت فيه أحد ميت له . وهذه امرأة فقدت إبنها من أهل الكويت فرثته تقول:-


قلت آه من علم ٍ لفى بـه قرنيـس=ياليت من هو ميـت مـا درا بـه
علم ٍ لفى به مرّس القلب تمريـس=والنار عجت في الضمير التهابـه
واليوم له عن جفن عيني مراريس=والحنظل المذيـوق زاده شرابـه
نصيـت بيتـه قلت له ياقرنـيـس=وين الحبيب وقـال: ماعلمنـا بـه
على الله اللي على ضمر العيـس=واليوم ما أدري أي خـب لفابـه
اقفى مع البيرق الحرب السناعيس=وإن سلمه وإلى المحادير جابـه
بعد الإنتهاء من المعركة وإنتصار شمر، تغنى الشعراء بهذا النصر الكبير...قال الأمير عبدالعزيز الجنازه لواحد من أخوياه رح لحايل وعلم الأميرحمود
العبيد تراه ما ينام و بشره بالنصر وعزه بالعيال وخذ هالبيتين ، يقول الجنازه وللعلم فالامير عبد العزيز ليس شاعر ولم يقل الشعر قط ... الا مرتين ..
. هذه احداهن::
يا هيه يا راكب المرسـون=سلم علـى ساهـر الليلـي
قل ابن صباح وبن سعدون=وبن سعـود وبـأ الخيلـي
كسرتهم والقضي ممهـون=بعيال شمر علـى الخيلـي
اركض كما شوشة المجنون=سبحـان رب مسويـلـي


والمرة الاخرى التي قال شعرا فيها ، قبل وفاته بأيام ::
راع الجمل وده يطيح=واللي على متنه رماه
ياعيال انا مالي نطيح=مليت من تال الحيـاه

ويوم وصل الرسول للأمير حمود العبيد تألم حمود لوفاة ابناؤه لكنه فرح للنصر المتحقق فقال::


عـزاه ياقلـب مـن العـام ملهـود=ولا جت علوم الغـزو ينسـاح بالـه
وإلى أبطوا الطرشـان تلقـاه منكـود=مثل الغليـث اللـي يحسـب لياله
والله لـولا حبكـم يافتـى الـجـود=لا حـج بيـت الله واصلـى قبـالـه
يالله يالـلـي للمخالـيـق معـبـود=يا الواحـد اللـي كـل حـي يسألـه
تجعل سهمنـا يمـت الضـد مقيـود=بسلامـة اللـي وافيـاتٍ اخصـالـه
عبدالعزيز اللي على الحرب والكـود=يصبر كما تصبـر عرايـب جمالـه
عطـاه ربـه خـلـةٍ مـثـل داوود=ولين اقلـوب التـرك لـه وإستمالـه
من العام غزاي على خيـر وسعـود=مــا ديــرة إلا بنـايـة ظـلالـه
الله يعيـن الخيـل ويقـوي الـقـود=عليـه لا سـنـه تعـلـى رحـالـه
واللي فتق فتق وهـو كـان مسـدود=ذبح الجمـل يقطـع بـزوره شمالـه
وإن ما مضى شئ ترى الحكي مردود=انشد بريـدة وإنشـد اللـي حوالـه
واللي تمنا الحرب ماهـوب مـردود=من حربنا مـا حصـل إلا الرزالـه
تر حربنا مثل البحـر مـا بهـا زود=الغبـه اللـي موجهـا فـوق جالـه
داخلـه مفقـود وطالعـه مـولـود=مـا اهبلـك ياللـي خابـر وتعنالـه
وش عندنـا الربـع لدعيـج وحمـود=وعريـب دارٍ يـوم تطـرد اشغالـه
يقـول مالـي اجـي نجـد مقصـود=إلا الأميـر احولُـه مــن جبـالـه
وابوه ما اكبر فزتـه يافتـى الجـود=وابوه لو هـو حالمـه كيـف قالـه
هو ما درى أن اجبالنا الحمر والسود=عين على الطبـاخ فـي كـل حالـه
وابـوه مانـا خابـر يطلـب العـود=ولا عندنـا لـه قالـةٍ بـه مقـالـه
غره سلاحـه خمسـة آلاف بـارود=ومطيـر وسبيـع ويــام ٍ صيـالـه
مثل الحبوش اللي يسوقـون محمـود=وأهلكهـم البـاري بعـزة جـلالـه
نقلهم الله لين جو حـول أبـو الـدود=ومن دمهم هـاك الطغاميـس أسالـه
حامـو عليهـم بالبواريـد وفــرود=ومبـارك ٍ نـجـاه ربــه لحـالـه
ماله شبيـهٍ كـود فرعوننـا العـود=اللـي نجـا والقـوم تفـرق قبـالـه
وفرعوننا المذكـور وإبليـس العـود=أطيب منه وأذرب منـه فـي فعالـه
ما هاب من ربـه ولا خـاف منقـود=أمـه لقـع قلبـه وشمـت بخـالـه
شيبـان أخوانـه مصليـن ورقــود=في فرشهـم ذبحـوا بليلـة ٍ غيالـه
وإن كان عند أمه جنيهـات وعقـود=لزمـا ً يغولـه مثـل غولـة عيالـه
ونكس علـى قومـه بخسـرا مفقـود=ومن ذبح منهـم وخِـذ شطـر مالـه
((خلوه بكويته )) وراحوا على القود=وكل ٍزبن لـه ديـرة ٍ فـي حلالـه


يقول كذلك مفضي السلمي:-
يالله أنك تعـز الشيـخ وتدلـه=دعوت العبد يامـولاي وتجيبـه
يوم جانى أخو مريم وربع ٍ لـه=هيّض مطير والعجمان وأجنابه
جاك شرهـٍ على حايل يبي ظله=ما درى أنه بلاد دونهـا لابـه
حايل ٍ حايل ٍ كل ٍ يبـي ظلـه=مار أبو متعب بالسيـف عيابـه
وين فيصل وشرب الكيف بالدله=ماثنى سابقه لارحم مـن جابـه
وين سعـدون ومـرده لعبـدالله=يوم حامت عليه الخيل ماشابـه
---------------


بعض المعلومات التي لم تذكر عن هذه المعركةأحببت أيرادها للفائدة :
1- ماجد الحمود رحمه الله تعالى لم يقتل في الصريف وأنما أصيب ومرض بعد تلك المعركة الشاهد
قصيدة والده حمود العبيد --هلا هلا بيك يالوجعان .... ياللي صوابك جرح كبدي ---ياخو الطريحين بالميدان .... اللي سبا يبهم الربدي
2- من المشاهد المهمة في تلك المعركة ( تحويلة شمر بالعمّارِيات والعمّارِيات هن البنات اللي يرقصن قدام الجيش تحفيزاً للشباب هل الخيل على الأقدام على الموت وعدم الخوف والتراجع .وقد حولوا عيال الطنايا بسبع بنات عمّارِيات مع جيش ابن صباح وكل واحدة حولة بوجه فارس من فريس شمر وقد حرص أبناء الطنايا على حفض كرامة تلك البنات والعوده بهن الى حائل وأكرامهن ومن ثم أعادوهن الى أهلهن سالمات على سلم العرب. والذي تخلى عنه الكثير في ذلك الزمان . وكانت إحدى تلك العماريات هي أبنة الشيخ ابن نقادان أمير العذبة من بني مره , والتي قال لها عبدالعزيز بن رشيد يوم حولوه وين ربعك ماأعذروا دونك ؟؟؟! قالت يامحفوظ جوهم ناسٍ مايقبلون العذر .ثم أنشدت قصيدتها المشهورة :


يانور عيني ياهل لبده =ياللي على الجمع دلاقه
ابن صباح أنهبد هبده=سعدون ماطلّق نياقه
هرج صحيح وله زبده =ماهي سواليف ملاّقه
حلت باطاريفهم عبده =والأسلم حماية الساقه

للمعلومية حول هذه القصيدة فقد كتب عنها مع الأسف كل من
1- الشاعر طلال السعيد2- والباحث ابو عبدالرحمن بن عقيل الظاهري3- والباحث عبدالله الدويش والكثير من الناس
وقالوا أنها للأمير/ عبدالعزيز المتعب وهذا خطاء والصحيح هو ماذكرفي الاعلى

ومما قيل قبل واثناء وبعد المعركه يقول حمود البدر(بعض الأبيات) :-

مرحوم يامن زارنا وأستخارا & واعذر وعاف من السهم وأبدا الأعذار

علوى يمين وكل يام يسارا & ان كنت شره أشرب قراطيـع الأمـرار

علوى الى دك الكبوس استدارا & أهل الشرا والبيع بالموسـم الحـار

ويام مثورت الجمل بالغبارا & انحاز الضديد ان كان سو الدخن ثـار

مهدين والله مرخصين العمارا & من دون عز الدار شاكوم الأشـرار

أنذرك من ثورة قوي المثارا & الـى ليامنـه ثـار تهتـز الأقطـار

صفوة صباح التغلبي مايمـارا & ولا ينتجـارا لا وعـلام الأسـرار

أنتم حرار من مواكر حرارا & وحنا عليكم مـن صورايـم سنجـار

ياراكبين اكـوار سـتٍ تبـارا=فج النحور افحاث مابين الأزوار
قولو وصـاة محمـدٍ بالقـرارا=نسيتها سجيت ياعمس الأبصـار

------
رد عليه الشاعر الكبير صالح السكيني من اهل شقراء قبل المعركه لأنه كان يعرف قوة جيش ابن رشيد وان
اخو رثعه ماينسحب خوف من احد فقال:-

ياراكبين فوق تسعه تبارا & مالفقوهـا مـن مصـدر وحـدار

ياعلي جفني عن كرى النـوم دارا=كنه يحط بناظـر العيـن سنجـار
سهـران مالـي يانديمـي قـرارا=يامسندي وشلون ضاعـن الافكـار
ناظر ركاب حمـود جتنـا تبـارا=ومشيّع ٍ مدحه على السيف بالكـار
ياعلي قـرب كيتـب لـي خيـارا=وسجلةٍ نكتب بها عـدل الأسطـار
نرسل جواب من حشا الصدر ثارا=مثايـل ماقالهـن كــل شـعـار
وخلاف ذا دنيـت نـاب الفقـارا=راسه الى شال الخطر تقل به زار
إنشر من الجمعـه وتـال النهـارا=نطوك ورى وبرك يطلعن الاشعار
وانشد عن المطران وعريـب دارا=وسنّع مبارك منزله وين هو صـار
تلقـاه بالصـمـان دون الـزبـارا=يرعى بريضان زهت كـل نـوار
القول قبـل الفعـل مابـه ممـارا=والـذم مايدقـم طويليـن الاشبـار
وقولٍ بلا فعـلٍ لـو قيـل عـارا=تراه مثـل اللـي نفختـه بمزمـار
والكذب محدٍ فيـه بايـع وشـارا=يكمل ولو هو عايش كل الاقطـار
والصدق يوضي بالدجى له نـوارا=والكذب مايرفـع عواميـد سيـار
طير البحر ماينوصـف للحـرارا=لو طار تلقونه على سيف الابحـار
والخيـل غمـق طنيهـا والمهـارا=والنار يقبس مـن مقابيسهـا نـار
تمدح مطير ويـام عنكـم يسـارا=في ضفكم يرعون من عشب الاقفار
لاشك لامن أشهـب الملـح ثـارا=هجّو وخلّوكم على جانـب الـدار
لابـد مـن يـومٍ يجيلـه كـرارا=تشوف ( علوى ) بأول القوم ذيـار
جاكم ولد متعـب ذعـار السكـارا=ماض الفعايل (..........) ودّمـار
لـه لابـةٍ مايلبسـون الــوزارا=ولا جمّعوهم من حساوي وبحـار
سلات اهل حايل عيـال صغـارا=لطامة العايـل قبـل دور الأبكـار
ان سبلو بالكـون جولـك نصـارا=قبيلهـم لاشافهـم يعطـي إدبـار
وبأيمانهم صنع العجـم والنصـارا=وموازرٍ تشبـه هماليـل الأمطـار


ورد عليه ايضآ

فرد عليه ناصر بن ابراهيم بن جعيثن بعد أن انهزم مبارك الصباح

في موقعة الصريف

ياراكبين فوق تسعه تبارا & مالفقوهـا مـن مصـدر وحـدار

ياحمود حديتوا جملكم وثارا & انشد مطير ويام وين الجمل ثار

طير البحر ماقد خبرناه طارا & والبوم ماقد صقره كل صقـار

ربعك معرفتهم بلبس الوزارا & وان حولوا بالبحر يجنون محار

وان سافروا للهند يم التجارا & تعوضوا مابين فلفـل وكنبـار

حنا حرار من فروخ الحرارا & لطامة العايل بضيعات الأفكار

-------
وقبل المعركه وجيش ابن رشيد يعرض عرضات الموت يقول نعيم الفرحان من عبيد الرشيد:-
يــاهــلا الـغـالــي=يالابتـي أوي مـن لابــه
نـحـمــد الــوالــي=يوم ان عمّي نـط مرقابـه
شــــال وإشـتـالــي=نبغي لحرب الشيخ واصحابه
نـلـبــس الـشـالــي=وان حل يومٍ فيه ضبضابـه
نـرحــص الـغـالــي=دون الجبل وخشوم صبابـه
ظـبــي الأسـهـالــي=من فعل ربعي تضحك أنيابه
غــــوش جـهـالــي=وان طب سوق الموت جلابه
طــقــه الـجــالــي=ولا لقـى شـيٍ يتهقـوابـه
--------
بعد ماصارت المعركه رد الشيخ سليمان ابن جمهور من اهل الزبيد توفي حوالي 1361 للهجره على حمود البدر شاعر الكويت يقول سليمان:-


1-جنح الدجى جاشا به الفكـر حـارا=محتار مدري ويـن تنـدار الأفكـار
2-عفت الكـرى ومجاضعـي للعـذارا=ياكن يطعن قومـة القلـب مسمـار
3-قبل البشيـر محيسـنٍ مـع نهـارا=الربع قسميـن بهـم بـارد وحـار
احـدٍ يقـول يانـاس الحـكـم دارا=لإبن صباح اللي ولى بـر وابحـار
واحدٍ نذر واحـدٍ حلـف بالجـوارا=ماصار مثلـه بالجزيـره والأقطـار
وحدٍ صعـد بالمـدح راس المنـارا=لمباركٍ لولا الحيـاء يامـلا صـار
إندر خماله وصار مدحـه خسـارا=اصبح وظنّه مابلـغ عشـر معشـار
الحمد للـي بإيـده الأمـر صـارا=المطّلـع عالـم خفّيـات الأسـرار
بخـلاف ذا ياراكبـيـن البـكـارا=عيرات من ذروات حفّـات الاوبـار
خمس وخمس عيونهـن كالشـرارا=مافوقهن غيـر السفايـف والاكـوار
بسمحـات الأيـدي نابيـات الفقـارا=عوص النضى من نسل ذروات عقار
خص الخواصر مانشـن بالحـوارا=محنونيـات ابليـل لاقـوس لاطـار
من جـاء لـدار خيـار مابالديـارا=هلا الزبيد اجواد و اكـرام واخيـار
مـادوّر النّـمـام فيـهـم نـعـارا=يخس الخسيس اللي بهم قال بـزوار
اولاد نجـدٍ بالفـخـر والمـمـارا=بالطيب وإلا بالـردى مالهـم كـار
ياركـب سيـرو بالنهـار الجهـارا=على عيون الناس لـوذو بالأكـوار
بالحزم عقب العـزم سيـرو يسـارا=خلو حسن بصري يمين عـن الـدار
ياركـب هيلـو الحـذار الـحـذارا=عن نـوم أو يـوم تقيمـون خطـار
ارخو لهـن الخطـم ليـل ونهـارا=حتى تجون حمـود بالـدار محتـار
اقـروه منـي بالتحـيـه وقــارا=ماجاء ليل وما سطع نـور الانـوار
وخوذو له الخاطر وقولـو مجـارا=ماجور يامكسور مـن غيـر جبـار
من عقب ماقيلـك عليـك إستـدارا=كيف انت مع ربعك على ضفوة النار
ياحمـود مـن قيلـك بقيلـه تجـارا=تقدح وتمدح والفعـل مابعـد صـار
جورك ومكرك يابن ناصـر قـرارا=اخطيت ياعمس البصيـره والافكـار
هل كيف تبني لك مـن الكـذب دارا=وتشيّد المبنى علـى درب الاخطـار
لاعاد مـال الملتجـي بـك قـرارا=لارحم ابو من دق بجـوارك جـوار
مبنى بنيتـه صـار ساسـه هيـارا=سوس على شافي شفا جرف وانهار
الكـذب بـه شـؤمٍ ولـؤمٍ وعـارا=بقولة ترانا مـن صواريـم سنجـار
عيال الحراير مثـل اباهـا حـرارا=وجميع طيـرٍ لا يغـرك وان طـار
هل كيف لأسـرار المغيـب تجـارا=ياحمود ليه أنهاك ياعمس الابصـار
لاعـاد مالـك بالعلـوم انتـظـارا=ولا انت بشيخٍ ياخذ الغلـب والثـار
تخـوض ببحـورٍ تلاطـم بـغـارا=بأمر الولي تنـدار بإقبـال وإدبـار
يرفـع وياضـع ويسمـع ويــارا=ويحكـم دواليـب بالأقـدار تنـدار
وينصر ويدمر والكسـر والجبـارا=بإيد الولـي قهـار دمـار الأعمـار
بالغيـب لـك رجـمٍ بليـا انتمـارا=حكمّت ربعـك بالحكايـا والاشعـار
الحكـم ماهـو بالمنـى والنـمـارا=إيضـا ولا بالطهبلـه توخـذ ديـار
والكذب مثل الجم وان نـزح غـارا=والفعل مثـل اليـم سيـار الابحـار
ياليت لـو مالـك لسانـك هجـارا=ماكان جاك من الشعر كثر ماصـار
ياليت ابو جابر من سنامـن لـوارا=حكمـه ولا سيّـر لنجـدٍ ولا سـار
وإيـزاه ربـع الفـا وعريـب دارا=واهل البحر والبدو يـدون الاعشـار
ياحمود سرتـو مـن بلدكـم بطـارا=وزمتكـم انفسكـم لحكـمٍ وتـدبـار
وثـرتُ وصـرتُ بالتمانـي نمـارا=وطابت لكم قطع الفيافـي والاقطـار
بقوم بهـا مغصـوب واحـدٍ بكـارا=مابين بحري والحضر واهل الاهوار
قوم بـه الهيـا بـن ناصـر كبـارا=قبل الملاقـى تحسـب القـوم دقـار
غرتكـم المهلـه بلـيـل ونـهـارا=حتى انتهت مـده انفـاس واعمـار
يوم انت بالتنهات ترعـى الخضـارا=ومربـعٍ تقطـف زماليـق الازهـار
الحر خطو النوب يخطـي الحبـارا=والضان ترثـع دام سرحـان ماثـار
ياحمود وين جنانـك اللـي تجـارا=ظنك بها تغـذي شجرهـا والاثمـار
اصبـح ماهـا غايـرٍ ثـم غــارا=قبل المساء غارت وشبت بها النـار
تقـول مايطـري علينـا انـحـدارا=تبـون حايـل مـع قفـار لكـم دار
خاب الرجاء فيكم وصـرتُ أسـارا=واحدٍ دفن واحـدٍ معشـى للأطيـار
خدراتهـا دار الفـلـك واسـتـدارا=هـبـن ولام وداركــم دور زوار
جاكم بلاكـم مـن هواكـم وصـارا=نهاركـم ليـلٍ وضاعـن الافـكـار
بين الصريف وبيـن هـاك الزبـارا=حقّت ولا بقّـت لكـم عيـن ديـار
ان كنـت واعـي فانتبـه لاتـوارا=هيهـات مالدرهـم يشاديـه دينـار
المـدح ماطـوّل شبـورٍ قـصـارا=والـذم مايدقـم طويليـن الاشـبـار
تمـدح مبـارك ياعشيـر السكـارا=قبل الفعل لـه رمـع زودٍ وتدبـار
وحنـا لمدحـه مانقولـه جـهـارا=إلا لفعـلٍ يابـن ناصـر وتـذكـار
ماصـار مثـل الضيغمـي بالبكـارا=إليا أقفى على عين المعادي بالأدبـار
لابـد لـه مــن دورةٍ وافـتـرارا=مراكـب تفتـر وعيـون واسـفـار
إليا أرجفت معـه السبايـا وغـارا=يشبه لهاتيـك الهواجـر وألأنصـار
حالـو ولا زالـو وجالـو حـذارا=وهدوّ ولا ردوّ لك الله عـن الحـار
هـذا فخـر سكـان حايـل قفـارا=ظنك بهم ماكمّلـو دشـن الاكـوار
مـن فعلهـم يـدوّر قـوي المثـارا=خلوّه يرغـي عقـب ماكـان هـدار
من عقب مايدعـى اميـر الإمـارا=والناس بأمره بالبـراري والأبحـار
واليـوم دخّـل بالمنـاور نـصـارا=اللي براسه طاح من زود واخطـار
هذا الفخر ياحمـود هاللـي يتمـارا=فعل ( الرشيد ) اللي رأيته بالأبصار
لا لاطلو وجهـك سـواد وسمـارا=حيثـك خبيـث وداري مـار مكـار
وحاطت بكـم خيـل عليهـا نمـارا=ضياغم جوكم علـى قـب وامهـار
سلّو وولّو فـي سيـوف النصـارا=مع صنع ابن بانـي للأرقـاب بتـار
قـوم علـى قـوم عبيـد وحـرارا=بكبودهـم مـرٍ وبقلوبـهـم نــار
قـومٍ لأخـو نـوره بليـل ونهـارا=ياطون لو ياطا شخانيـب الأوعـار
قـومٍ تفـت الكبـد هـي والمـرارا=حريبهم يشـرب قراطيـع الأمـرار
قومٍ لهـا بقلـوب الأعـداء ذعـارا=تشفي غليله مـن قبيلـه الـى ثـار
قـومٍ تراهـا مـن طناهـا سهـارا=على الحكم عيّو بالأملح عـن الـدار
قـومٍ لهـا عـزٍ ونصـرٍ تـبـارا=ياعـل عـزه بالجزيـره والأقطـار
قـومٍ لهـا يـومٍ تبـيـع العـمـارا=منول البضر بسيوفهم تشتعـل نـار
قومٍ ربـو بالحـرب ماهـم تجـارا=مالها خختشن المعـارك والاكـوار
قـومٍ بهـا زومٍ نـهـار المـثـارا=إليا اذكر حربهم عند حلو الكرى طار
80-قـومٍ لهـم منـي سـلام ووقــارا=جميعهـم مابيـن جهـال وصغـار
81-وصلو علـى سيـد قريـش وقـارا=مالعلع القمري على روس الأشجـار
--------


وبعد المعركه يقول العزي وهو عبدالعزيز عيسى الهذيلي راعي البرّه من قبيلة مطير (وله قصه طريفه انه قبل ماتشتبك المعركه قام مبارك الصباح يشاور شيوخ الجيش اللي معه فقال العزي انا طالبك ياشيخ ان صوتي هو التالي قال مبارك وصوتك هو التالي فشاور مبارك خوياه والتفت وقال هاه يالعزي وش عندك قال ياطويل العمر انتم تعرفون عبدالعزيز ؟ بكم احدٍ شافه؟ قالو حنا جايين نشوفه (الحرب) قال العزي ياطويل العمر انا شفته قطعت مرات الوجه اللي انا شفت هو يجيكم ماهو انتم تجونه يقولون ان مبارك بصق في وجهه على الفال اللي ماهو زين وما هي إلآ لحظات وتصدق فراسة العزي يوم الجنازه هو اللي غزاي عليهم) يقول العزي راعي البّره :-

يامزنـةٍ غـرّا نشـت مـن مغيـبـه
ترعد وتبـرق ساقهـا رب الأربـاب
ترمي الصخب شرّه على من تصيبـه
بأركانها تسمع كما ضرب االأطـواب
طمّـت وعمّـت وإدلهمّـت غضيبـه
واستثقلـت باللـي لـلأرواح جـذّاب
تبغي الحريب اللي دنـا مـن حريبـه
ابن صباح اللـي تعـرض للأسبـاب
دوّر وجمّـع مـن تـردى نصيـبـه
بأهل الكويت وكل من كـان خشـاب
ومن كـل غـواصٍ وسيـبٍ يجيبـه
واللي يحزمون السمـك زام حـرّاب
وبعريـب دار وكـل مـن يرتجيبـه
وراع النفاق ومـارق الديـن ماغـاب
وجموعـة العجمـان واللـي حظيبـه
مع الدويش ومن ولاه مـن الأجنـاب
والمنتفـق وابـن شـريـم ونسيـبـه
وسكانـة النقـره وسالـم وغصّـاب
حـل المنـاخ اللـي عليهـم دعي بـه
كل ديرته يحـذاه جـلاب الأجـلاب
يبغـي مناصيـبٍ تحـدر غصيـبـه
وعنـده مناصيـبٍ تعلـت بـالأرداب
واللـي دعـاه وسـاعـده مايخيـبـه
يومه (........) وفي مامضـى تـاب
عنـه السبـايـا والسـرايـا بغيـبـه
واللـي يـروون المراييـش غيـاب
والله ماصـدو عـن الــدار هيـبـه
مـار انهـم ياتايـه الـراي أجنـاب
عنده نـزل حـوض المنايـا بطييبـه
عوق الحريب اللي اذا زيـر ماهـاب
سيّـر عليهـم بالجمـوع الصليـبـه
جيشه مـع المسيـوق يحـداه الآداب
ثار الدخـن والعـج وإنجـال خيبـه
والشمس عنهم كنهـا تقـل بحجـاب
نـوٍ يـروّع بالخضـيـراء حنيـبـه
خص الجموع اللي عليها السماء زاب

فيـه الـزلازل والمنـايـا تجيـبـه
ومزن الغضب ضرن على كل منصاب
وفيهـا مخابيـصٍ وبـرقٍ مصيـبـه
وحتى الرعد به حس عدلات الإجهاب
ورمـى بحمـران النواظـر حبيبـه
ضياغمٍ من فوق طوعـات الأرقـاب
رمى لهـم مثـل العساكـر خشيبـه
بصمـعٍ وثـلاثٍ وللمـوت أسـبـاب
إليا حلت البلـوى علـى مـن بليبـه
ينفـك للمبلـي مـن الله ميـة بـاب
يذكر لنا فـرز الوغـى شـق جيبـه
ونذر وحرّم عقـب رميـه للأسـلاب
حظـر الجبـل ردو لهنـدٍ عجيـبـه
هندٍ مفاتيـح الفـرج عنـد الأكـراب
فـي ساعـةٍ وادع حبيـبٍ حبيـبـه
وردو خطاة العمر مخطـاه ماصـاب
تخالطـو مـن كـل كـفٍ ضريـبـه
لمـا غـدا مابينهـم تـقـل حـنّـاب
حريقـةٍ مايـبـرد الـمـاء لهيـبـه
مثل السعايف عندك الجمـع لاعـاب
ويـن القنيـب اللـي يميـز قنيـبـه
بـرقٍ ودخـانٍ وعــجٍ وسـكـاب
شيّب بهـا اللـي مابعـد حـل شيبـه
وغـدا بهـا شبّـان الاولاد شـيّـاب
يـومٍ علـى الباغـيـن ماينحكيـبـه
عثا بهم طير السعد غـوج الأطـلاب
عجرٍ ثـلاثٍ بـه والاخـرى عطيبـه
ماهاب والموت الحمـر لـه تلهّـاب
غريو هلا النقـره مـع شلـة دبيبـه
لومك على اللي أدبرو عنـك هـرّاب
جابـوك شمـر ياطويـل الذويـبـه
بين السبايـا وبيـن عذبـات الأنيـاب
ياللـي تقـوده قـل حـقـه غديـبـه
مع وقعة البـرّه ومـن كـان طـلاب
ومـن لاعليـهـم حـجـةٍ يدّعيـبـه
ذا موسم اللي حاضره سد من غـاب
ياذيـب سفـوه نـاد ذيـب القريبـه
وإجذب من السلمان والحزل وإنصاب
وإجذب من سبـاعٍ بالمقاطـع مغيبـه
وإجذب من السوده للجوف والضـاب
وباقي السباع الغايبه ويـن هـي بـه
إقنب لها ياذيـب فـي كـل مرقـاب

يلحـق بـهـا سـبـعٍ رديٍ نديـبـه
وشهب النسور وكل فـرّاس بالنـاب

ولا تفـرس إلا كـل بيضـا سنيـبـه
إفـرس مشاكيـلٍ وزلبـات وركـاب

مثل الهشيـم اللـي بفيضـة شعيبـه
هشيـم طلـحٍ كـل الايـام عـيـاب

بأرض الصريف اللي وطاها وطيبـه
شرق وشمال وقبلـةٍ عنـه معـزاب

الضبعة العرجاء غـدت بـه رطيبـه
وكل السباع الضاريـه كيفهـا طـاب

ياويـل عمّـي جرّهـا مـن حسيبـه
(....) على الرمـش شقّـن الإيـاب

شيـخٍ يراعـي يـوم حـزّة نشيـبـه
على جموعه من المغليـن ضبضـاب

من فوق جال مثـل وصـف الرقيبـه
خيالـة الشرفـه ومحـدٍ معـه تـاب

زلفاهـم الـدجّـال نـقـرة نشيـبـه
نـار المسيـح وذل يلحـق بمطـلاب

من فـوق حـرذونٍ يحـز الشطيبـه
بفقر الوقارى رادفـه عقـب ماشـاب

في فرصـةٍ حـدر الدجـى مادريبـه
قب السلاح وبـدّل السيـف مشعـاب

والغـوج خلـي مالقـى مـن يجيبـه
عند ابن شايم مالقـى الغـوج ركـاب

عاضـوه بالحـوّى فيـاضٍ عشيـبـه
مايشبع الرجال مـن عشـب عشـاب

ذكـوه فـي ديـرٍ كبيـر المصيـبـه
تسعين ليلـه مقعـد الشيـخ ماطـاب

دار الفلـك ياللـي هبوبـه مجيـبـه
شيـخٍ يريـد الحكـم ماهـو بنهّـاب

على النقى يـرد النضـا مـع شبيبـه
لابان في قـوم المعاديـن مضـراب

كونـه صـبـاحٍ مـايـدوّر عقيـبـه
من غب كونه ينصب السوق حسّـاب

إيضا الدواسر كـون وإيضـا عتيبـه
واللي حضر منهم عن اللي مضى تاب

كون ابو متعب مع صديقـك يصيبـه
قوم ابن مرشد صابهم مثـل ماصـاب

جاب الله الديـدب وهـو ينثنـي بـه
=تجوير ربدا دوّلـت عقـب الأعقـاب
وشبّ الفنم للـي مشـى يقتـدي بـه
طـوال ليلـه قـاريٍ تقـل مشهـاب
وصوّت لمـرزوق (........) لعيبـه
وتعاقب الترديـد شطريـن الألعـاب
عزّي لكـم ياهـل الجفايـا المريبـه
من ليلةٍ يصبـح بـه الجيـش ريـاب
واللـي تنصـاه النقـايـض غديـبـه
قوم الغبينـي وابـن عرنـان وذيـاب
هـذاك مقطـوعٍ وهــذا مصيـبـه
متوسـطٍ شـرّه تواضيـت الأعـراب
والسبـر ماعقـب المغيـره نبيـبـه
ذاقو به الفدعـان مـن كثـر مـالاب
خلـي نصـي رمـاح قفـرٍ رطيبـه
من عقب كون سبيع للصيـد ملعـاب
سعـدونٍ مـن كـونٍ فنيـعٍ بقـيـب
يالله حصل للمنتفـق عتـق الأرقـاب
لاتـامـن الـدنـيـا ولا تلتهـيـبـه
تقبل وتعطي عنـد الإقفـاي عرقـاب
أليا أدبرت قصـت محـوصٍ قطيبـه
وان سانعت أدنى شريـطٍ لهـا جـاب
السيـل ماينـزل مجـاري شعيـبـه
ولا ينزل الوادي إليا صـار مجنـاب
واللي صديـقٍ لأخـو مريـم شفيبـه
بدل مقـرّه عقـب الإشمـال إجنـاب
الحاكـم اللـي بالمنـاور صحيـبـه
ماعاد يطلع بيرقـه مـن ورى البـاب
حتـى لذيـذ النـوم مايهتنـي بــه
بالليـل زامـاتٍ ورى بابـه أبـواب
واللي يبي شـر الضياغـم بلـي بـه
واردى ركابه بالمشـاري والاطـلاب
زبن العطيـب اللـي جذابـه هليبـه
يـوم السبايـا عندنـا تقـل ملـعـاب
به من ذراها مـن لواهـي صحيبـه
وياصل حتى لو على الطاس فلهـاب
على العدى سمٍ إليا مـن إشفـي بـه
والسـم نـدرٍ ماتداويـه الأطـبـاب
وللصاحب أحلى للجسد مـن حليبـه
وأحلى من السكر على كبـد شـراب
يعنـى لفضلـه بالسنيـن الجديـبـه
يرّبع به الممحـل سنيـنٍ بالأجـداب
شيـخٍ عطايـاه المـهـار العريـبـه
وجيشٍ وليـراتٍ إذا جـوه الأجنـاب
شيـخٍ أذا سمـع الخطـا مارضيبـه
يحـط للدايـج بـالأسـواق نــواب
والخاتمه مـن عقـب ماقـال اجيبـه
وشهدو عليـه اللـي بالأقـلام كتـاب
اخـزاك ياعـلام ذنـبـي وعيـبـه
والعبد يذنـب وانـت يالـرب تـواب
وصلو علـى طـه عسـى يستجيبـه
يشفع لنا بالحشر فـي يـوم الحسـاب








منقول من شبكة برزان (لحفظ الحقوق )

</B></I>

 

 

 

 

صالح العريف..

شاكره لك كل الشكر لطرحك الراائع
مجهووود تشكر عليه اخوي
يعطيك ربي الف عافيه
لك ودي واحترامي..

 

 

 

 

موضوع يستحق التقييم بجداااره .... واللله قريته كله وبقرؤاااه مره واثنين وثلاث .... او الفدعان مع ابن صباح ماكان انكسرو خخخخخخخخخ ..... أبو فهد ربي يعطيك الف الف الف عاااافيه على الطرح الي بقمة الرووووعه .... دمت بود ,. تقبل مروووري