قومي عدل يا بنت لن جيت أحاكيك

قومي عدل يا بنت لن جيت أحاكيك
أنا بدوي ما يثني الحب راسي


لا يخدعك قلبٍ يحبك ويغليك
قلبي شديد الباس يا قو باسي


ولا تحسبين الروح خاتم بأياديك
يا قلبك المسكين بالحيل ناسي


أقدر أحبك موت وأقدر أجافيك
وأقدر ألمّك وأنثرك للمآسي


وأقدر أخطّك في فؤادي ولا أمحيك
وأقدر أخلّي يجهلنّك حواسي


ياللي من أول كل ما أوحيت طاريك
يفزّ لك قلبي وتشعل حماسي


كانه جمالك تالي الوقت معميك
غرّك جمالك بكره الوقت قاسي


وقتٍ جمع بين البطل والصّعاليك
يقدر يكسّر كاس حبك وكاسي


ما أذلّ نفسي في الهوى لأجل أراضيك
أحيا وأموت بعزّ والعزّ ساسي


قومي عدل يا بنت لن جيت أحاكيك
والاّ يموت الحب ويعيش راسي