ناديـت ل(إثنيـنـه وعشـريـن) دلاّل
مـن عالـم إثنينـه وعشريـن دولـه
معي بضاعـه للعـرب تُضـرب امثـال
لأوّل سـلاح إستخـدمـوه بسهـولـه
عقب السـلاح المـزدوج سيـئ الفـال
هـذا (برخصـة) ثابتـة وامحمـولـه
راعيـه الأول مـن مشاهيـر الابطـال
فايز علـى (بـوش الولـد) بالبطولـه
يـوم الامريكـي قـام يزهـى ويختـال
سـدّد لخـدّه وحـدةٍ مــن نعـولـه
وشفت العرب مـن كثـر ماذاقـوا إذلال
سمّوا على اسمه وارقصـوا واهتفولـه
(أمحق) عرب و (امحق) طموحات وآمال
ان كان هذا نصرنـا اللـي سعـوا لـه
وش عاد اقول؟ وما بقى شيء ينقـال!
الهـرج يقصـر والقوافـي خجـولـه
والحـال مايـل والعـرب ليلهـم طـال
والوضع مـزري والامـور إمعفولـه !
وحنـا نقـول انّـا طحاطيـح وارجـال
(حسَب) ، مقاييـس العـرب للرجولـه
تثبـت رجولتـنـا بطاقـات)الاحـوال
والدّم راهي فيـه : ( جيـن ) الفحولـه
وكـلٍ علـى ليـلاه يسـري بـمـوّال
وكل(ن) علـى عميـاه يشعـب ذلولـه
متى تصير اوضاعنـا عالـي العـال ؟
ومتى الكـلام اللـي نقولـه نطولـه ؟
نحتاج حلّ ولـو حصـل بألـف حـلال
من راس (عبدالله) تـرى الحـل حولـه
قايـد بطـل رجـال مـن راس رجـال
جعلـي فـداء قلبـه وراسـه وزولـه
والـلـي يميـنـه دام عــزّه ولا زال
(سلطـان) سيـفٍ ماضيـاتٍ فعـولـه
ان قـام قمنـا لـه خفيفيـن وإثـقـال
ناخذ علـى العـدوان صولـه وجولـه
معه مثـل سيـلٍ مـن الجـال للجـال
مـن مـاه وديـان الكبـود مغسـولـه
أمّا انطلق منّا الوجـع (طلقـة إعقـال)
مـا نرجـع الاّ والأمــور إمحلـولـه
ولاّ تصـيـر اقوالـنـا دون الافـعـال
ونبقى عـن العالـم شعـوب امعزولـه
رجّالنـا: ماعـاد يـشـرب بفنـجـال
يصبـح ويمسـي عـورةٍ فـي همولـه
قلتـه وعنـدي حـل واضـح وفـعّـال
نتبـع كتـاب الله وسـنـة رسـولـه
وانزيّـن النيـاّت وإتزيـن الاعـمـال
ويصيـر يـوم بقـوّة الله وحـولـه !
والمسألة لو هي علـى حذفـة إنعـال ؟
تلقـى العـرب كـلٍ مضيّـع نعولـه !!