ديوان الشاعر احمد سعيد /الامارات

قصيدة أطراف بيبانك

يعيش الشوق في أطراف بيبانك =جروحي يا بعد روحي ينادونك
ياعمري جيتك مْن الصبْح من شانك =وبان الليل ولا بانت لِيَ عْيونك
إذا كان السبب من حقْد جيرانك =فانا والله لخليهم،، يحبونك
وإذا كانو هلِك حِكمو بحرمانك =فانا والله لخليهم،، يخلونك
وإذا كان السبب من باس طغيانك =فهاذا أسهل الأسباب في كونك
فديتك.. ماذكر انّي جِبْت نسيانك =على بالي لأني صرْت مجنونك
أنا شَجْرة رُوَاها عذْب وديانك =آنا دمعة تِهِل دْموع من دونك
أنا نهرٍ غدا يَسري بهتّانك =أنا كلمة تَصِف إحسان مزيونك
أنا ثمرٍ بدا ينضج في بستانك =أنا شمسك أنا ظلّك أنا عونك
أنا هايم بعذْب الحان قيفانك =وأنا صاحي إذا هي مالت غْصونك
وترا والله أبَعْفِد فوق جدرانك =جنون الشوق خلّا القلب مجنونك

 

 

 

 

قصيدة .. وما زلتي

أنتي.. كما كنتي.. ومازلتي خطر =وانا من ايام الصِبا كنت الحبيب
اللي درو عنه الأوادم في قطر =ولا درا عنه فؤادج.. والعجيب!!
سبعة عوامٍ يالغلا.. قلبي نطر =سبعة عوامٍ دعوِتي "يالله قريب"
أن تفهمي معنى فؤادٍ انفطر =في حضرتج.. وانتي تحسبينه غريب
جيتج.. وانا كلّي تغطّيت بْعطر =أبغي نظر.. وانتي تحسبيني غريب!
جيتج.. وانا كنّي سحابه مع مطر =ودّي تحسّيني.. تحسبيني غريب!
أنا كتبتج في الشعر في كل شطر =ولو درو عني البشر قالو: مُريب
ماهو مهم،، لو ما فهمتي أي سطر =بس افهمي أنّي من الخاطر "حبيب"

 

 

 

 

قصيدة ٢٠١٠

هاذي حظوظي و الأسى طوّل =مالي ومال اللي يواسينا
في عالم الأحلام نتجوّل =نمشي على أنغام أغانينا
والأغنيه لو صيتها حوّل =كانت أغاني الحب تُبكينا
ألفين وعشره بالحزن فوّل =قلبٍ.. ولين اتقنّح حْزينا
من بعدما كان الأمل أوّل =يَبني صروح الذات.. يبنينا
صار الأمل تايه وانا اتسوّل =بسمة، تصحّي اللي بقى فينا
ومع تالي الأيام بنعوّل =دعوة وعسى تُقبل دعاوينا
لو ربنا احيانا عمر أطول =يالله عسى تِكمل إمانينا

 

 

 

 

قصيدة أسير الياس

تطيح الدمعة من خدّي وعيني ما تجيها انْعاس =واذا هالناس مرتاحه، أراها في عيوني تْصيح
يجيني الهم و الحسره .. واطوّقهم على الإحساس =أحس انّي افكّر صح ! وبالأحرى أبي تصحيح
غمامة ضيق من راسي.. و يرعد بالسما وسواس =وتهطل مطرةٍ تهدم .. وتحجب عنّي التلميح
أنا يا ناس فيني حزْن في قلبي وهو دسّاس =سكن واستملك بْقلبي بلا إذن ٍ ولا تصريح
حبيبة قلبي أو قولوا.. طليقة قلبي بالآساس =وهل معقولة تتركني بلا كلمة ولا تلويح ؟!
لقت حبٍ .. بقلب الشاعر اللي ممتلي هوجاس =وراحت بعدما ذبحت.. ضمير وكان بالتجريح
وخلّت قلب ينبِض بالمحبّه و سعره بالألماس =وحيدٍ انوَلد ثم طار وحده في مهب الريح
قوي الباس في لحظة،، غدا كنّه أسير الياس =تضيع أهدافي قدّامي وانا ألعب لعِب ترجيح
ولو انّي حزين و زاد هَمّي هِمّة الخنّاس =ولكنّي أبد ماطيح ولو طرنا أبد ماطيح
صحيح الحب أعجوبه،، ولكن الوفا نبراس =واذا المحبوبه خانت،، فالمحبّه كلّبوها ميح

 

 

 

 

قصيدة ما لقيتك

تدري وش أصعب شي مر بحياتي؟ =لمّا رجعت ابلهفتي.. ما لقيتك
يا ناكر المعروف هاذي جزاتي!! =أرخصتني ما تذكر اني شريتك؟!
أمحيت من كل دنيِتك ذكرياتي =أنسيتني قولة: "حبيبي فديتك"
آه يا حسافه اعتبرتك.. غناتي =واليوم،، كانك هاجر ٍ دفء بيتك
يعني قطعتك بالوصِل،، ما تحاتي؟! =هو صح قطعتك بس أبد ما نسيتك
طاريك في صبحي وفي أمسياتي =أرقد.. وفي حلم التلاقي رجيتك
استغفر الله جيتني في صلاتي =ما غبْت عن بالي،، وانا ماطويتك
في صفحة اسنيني كتبت أمنياتي =وختامها شاهِد،، أنا اللي بكيتك
تدري وش أصعب شي مر بحياتي؟ =لما لقيتك صدفة ً.. ما رأيتك