المال مايرفع مقام الهلامه

• المال ما يرفع مقام الهلامة
• والقل ماقلل مقام المطاليق
  
• الموت جاي وتالي العمر خامة
• عقب الفضا مامن بديلٍ عن الضيق
  
• يالله. نسألك الستر والسلامة
• في ساعةٍ من هولها ينشف الريق
  
• يوم الفتى ماينفعونه . عمامه
• عند الولي تفتح. جميع الصناديق
  
• واليوم. طارت يالوجيه. الحمامة
• والطيب طنخة والمماشي توافيق
  
• عامين. زلّن والملامة . ملامة
• والوقت طرّف والعزا بالمواثيق
  
• وين الشيوخ اللي تقود الجهامة
• مجد الجدود اللي بروس الشواهيق
  
• تلاحقوه إن كان باقي. شهامة
• لا تضيعون سلومكم. والطواريق
  
• (عبيد) ليته ينتهض من منامة
• يطلع على الحيين ويشوف ويويق
  
• الحظ يالذيب العرج بانخدامة
• المجد غرّب والركايب بتشريق
  
• و (دهام) ليته ينتفض من مقامة
• من عقبهم صرنا سوات المطافيق
  
• أو ليتها من قبل وقت الندامة
• تدفن مخاليقٍ وتظهر. مخاليق
  
• يا الله يا عالم بيوم. القيامة
• و يا عالمٍ ما تحتويه المغاليق
  
• يا رب ما غير الستر. والسلامة
• وأنك تفضّيها قبل لحظة الضيق
  
• #عايد_الشهيل