الطيب صعب ومعتلي مجاراة نار

الطيب صعب ومعتلي قمة الراس
ولا يقدره منهو اعزومه رديه

الطيب يبقى للرجاجيل نبراس
والا العفون اعفون بالمقدريه

الحمدالله يوم الامجاد تنقاس
ونقدر عليها بين ذيه وذيه

سعود بن معزي العنزي
⭕⭕⭕⭕⭕
مابين معلوق وقريحه وهوجاس
وخواطرن شرد .. وحنايا عصيه

هيضتني (ياسعود)ياطيب الساس
ببيوت شعرن .. كنها الشاذليه

الطيب لو تقدر عليه اكثر الناس
ماكان ضعنا بين (حر) و (حديه)

محمد الفرحان
⭕⭕⭕⭕⭕⭕⭕
لا لاح برقا الحيا جاك عساس
والطيب وهبه من جزيل العطيه

لوهي كذا محدا"تردى من الناس
لاشك صعبه والمراجل عصيه

والجود بحره بالمراجل ماينقاس
دونه تبي تتعب عضود المطيه

كاتب خلف ابن عريفج اليمني
⭕⭕⭕⭕⭕⭕⭕