ديوان الشاعر طلال الرشيد رحمه الله

ضيّعتْني

ضيّعتْني

شريتك إنت بكلّ شيّ

وبعتني

ولا نسى يوم إنّي.. انا هلّيت بك

ودّعتني

يا آخر الأبواب..

من ودّع ببسمة حزن.. أحبابه غيري؟

يا آخر الاحباب..

من قفّلوا في وجهه الأبواب غيري..؟

يا آخري بالله.. ليه ضيّعتني؟

الحب.. ضياع..

وإن كان ما صدّقتني.. شفني

ألــــم..

وأقول لو حلّفتني.. إوصفني

ليت أقدر أختار أحبابي

يبرى صوابي

وما كان قلت من الندم

كلّه من أسبابي

ويا غايتي باللَّه.. ليه ضيّعتني؟

لا .. لا للندم

لا للألم

لا للسؤال اللّي يحيرني جوابه

مسكين.. من صدّ وبكى

كلنٍ درا به .. إلا أحبابه

يـ معذّبي.. واهوى عذابه

دنياي وعيونك تشابه

حبيبي.. لا والله أكثر من حبيبي

ناسي وهلي..

وأصحابي وربعي وقريبي

باللَّه.. ليه ضيّعتني....؟

 

 

 

 

ذهــول اللقـــــا

انتهى الموعد و انا تو ابتديت
اجمع احساسي من ذهول اللقا

ذبت من نار الحنان وما دفيت
والشتا ضيع ظنون اللي هقـا

قلت كل اللي ابيه وما حكيت
كل حكي الشوق لعيوني رقـا

تهت وبرعشة يديها اهتديــت
وش قضى من عمر حلمي وش بقا

انتشي..واذا نوت تمشي شكيـت
للزمان بساعتي طوول الشقـــا

وين بلقاها بعد هذا .. وليـــت
ضاع معها الوقت بذهوووول اللقـا

 

 

 

 

أوعدك ..

أوعدك .. ان كان بعدي يسعدك
الليله ارحل
من الليله باختار الطريق
من الليله الليل الرفيق
وأوعدك
ماأعاتب أو الوم .. إلانفسي
ومادام في قلبٍ معك
أوعدك
حبيبتي ياليت
ماأقولك ياليت
وماقد تمنيت وشكيت
حبيبتي ويلي
لامن غدى جسري
أنا لنسيانك انتي ذكرياتي
حبيبتي
مأصعبه نسيان ذاتي
ولا أقوم .. أوعدك
سريت
عن الليل اللي فعيونك
عن بلادك سريت
وأوعدك
اني اقول اني نسيت
بس أوعديني
لازارني طيفك وأنا وحدي
أني ماابكي
وانك بقلبي تموتي
وأنك على عيوني تفوتي
وماأعرفك
وأوعدك
اني من الليله أموت
من يوم أقوم أودعك
أوعدك

::

 

 

 

 

ماقلت أحبك ولا قد قلت ما أحبك
أحب مالي عيوني وانت تسواها

لو تدري شكثر تعني لي تعرف انك
آخر أمل في حياتي وأول مناها

ياكثر أحس ان بك مني وبي منك
روحٍ قسمها على شخصين مولاها

لا تقول شتحب فيني أعشقك كلك
من ليل شعرك لشمسك لآخر أقصاها

سميتني نصفك الثاني ويا شحك
انا بسميك كلي وانت معناها

تعبت أوديك له ياقلب ويردك
لا خذا حلومي ولا خلاني أنساها

كل الحمام استراح وناح في ظلك
والورد الأصفر سقته الروح من ماها

ليتك بعمري ثلاث أشخاص ما ملّك
واحد معي دوم وواحد روحي يملاها

والثالث بجفن عيني لافقد حسك
أو غمض الجفن جاني فيك يتباهى

مو بس أحبك أنا والله من حبك
أحب حتى ثرى الأرض اللي تاطاها

 

 

 

 

مشتاق

ومضنيني الفراق
يا عيونها خذي من عيوني تعب
واعطيني من جفنك فتور
وابكي علي لو بالكذب
مليت بك طبع الغرور
يا عيونها مشتاق
وللدمع مع جفني عناق
مشتاق ومضنيني الفراق
يا اجمل الخود
كنت الامل وانتي الوعود
وهجرني من هجرتيني دفا بيتي وانا فبرد الشتا موعود
ايا مسكين يا قلبي انا ماشي وهو يلتقت لك عود
ايا مسكينه يا روحي تحب اللي يعذبها و يزيد صدود
وحشتيني
كثر ما خانني هذا الزمن واكثر وحشتيني
احبك حب اكبر حيل من كلمة احبك واسألي عيني
يا اقرب من نظر عيني لعيني
يا ابعد من حنانك عن حنيني
امانه كيف تنسيني
وانا من ليلة التوديع الين الحين
احس ايديك بايديني

 

 

 

 

السلام عليكم

هذي قصيده طلال الرشيد الي قالها في اولاد البراهيم

مناسبه القصيده...

وهي .. عندما كان طلال الرشيد ( رحمه الله ) في مقابلة مع قناة mbc والتي يملكها الوليد بن ابراهيم ..كانت المذيعة تنادي الشاعر طلال .. بالأمير وفي منتصف المقابلة أخذت تناديه بالشاعر .. استنكر ذلك وسألها عن سر ذلك .. فقالت أنه جاءها اتصال ويطلب منها ذلك .. فما كان منه الا أن قطع المقابلة ..وغضب من ذلك .. مما دعاه الى كتابة القصيدة



يــا صـغـيّـر مـا يكـبرنـي لـقـب
........................وما يصغرنـي إذا انكرنـي صغيـــر
ما خذينا الصــيت من جمــع الذهب
........................ولا نسابـة شـيـخ او قـربـة اميــر
كاسبينه من هــل الســيف الحـــدب
........................الجـايـز كـان مـا جـاك الـنـذيـر
صيتهـم نجــم ٍ علـى رأســه لهـــب
..........................سمعوا الصقهان به واجهــر ضريـر
بالـوفـا تـاريـخ أبـيـض ينـتـصـب
..........................لا حكـوا بالـحـق حيـيـن الضمـيـر
ضيغمـيـن للسنـاعـيـــس انتـســـب
..........................لابـةٍ طـلـنـا بـهـا عـرش كـبـيـر
عنـد حـدك يــا كثــر الهـرج تــب
........................لا تـمــر الــنار وثـيـابـك حــريـر
كــان لــك عـــز بـذلـي فتـعـقـب
..............................والله ألا تبـطـي وحبـلك قـصـيـر
احسبـنـك مــن صنـاديـد الـعـــرب
..........................واثــر ساتـرتـك عباتـك يا غـريـر
ما حسب للــسوس زراع القصـــــــب
..........................والقـراده ما درى عنـهـا البعـيـر
ولـو حسبنـا للحسايـف والتــــعـب
..........................مـا بذرنـا يـا العصافـير الشعـير
عـن هللـك ابــراي لله واحتــــسـب
.........................الرجـال الـلـي مجـارهـم عسـيــــر
من قريش المصطفـــى وابولهـــــب
.........................والدغالـب ما غشـت عــذب الغديـــر
للرجـال مــن الرجاجـيـل العـتـب
.........................والزكـاة تحـل فـي حــــال الفقـيـر
لعنـبـو وقـــتٍ غديـنـابـه حـطــب
.........................تـحـرقــه نــار يـثـورها اجــيـــر
ما ألومك والزمن ســوى العجـــب
.........................هـو بقـى غيـر الكرامـه بالجفـيـــر
مـا أذل وراســي يـشـم المــهـب
.........................لـو بقى مـن شمــر طـفـــلٍ غـريـــر
مــا اهــاب ولا يزلزلـنـي غـضــب
.........................الشجـاعـه ورث الـعـاقــل غـزيـــــر
يا صـغـيـر مـا يكـبّـر باللـقلب
...........................غير مـن هو كـان من دونـه صغيــــر

 

 

 

 

اهلي بالنظر


ايه لاشفتك بهلي بالنظر
عن عيون الناس بعيوني الوصال
لالمحتك فالخيال وفالصور
زان لي وصفك واغني لك تعال
في هواك من البحر شيمة غدر
وفي هواي من البحر سر الجمال
وفي هواك من الشعر كذب الشعر
يلقى نفسه في سؤال يجاوب بك سؤال
الهوى سلطانة بقلبـــــــــــــي سحر
والهوى ذنبه على قلــــــــبي حلال
الهوى فعيونك النجلا قبـــــــــر
وللهوى في قلبي الواله دلال
ليه لاشفتك اهلي بالنظر ؟
في عيون الناس ابصرخ بالوصال

 

 

 

 

ياظلوم


ياظلوم

الناس لانامت انا اللي ماانوم

لاتلوم

جيتك ادور فيك تفريج الهموم

اتذكر اني فيوم انا ناديت

حبيبي القاسي

ولاانسى انك يومها رديت

مين انت انا ناسي؟!

ورجعت انا مكسور منك خاطري

خجلان من ناسي

ليه ياظلوم




اعذرني لوقلت

انك اقسى من زماني

اعذرني لوصرت

اشبه حبيبي الاناني



اعطيتك

ماانتظر رد العطا

هويتك

وقلبي لك فراش وغطا

اواه ياصوتي

اللي تكسر بالمسافة

اواه ياصوتي

اصرخ انا فراقه اخافه

يابايع ايامي بيوم

ليه ياظلوم




مياس الاعطاف

صحت بك من جرح نفسي

والله انا اخاف

يكون باكر مثل امسي


ياقاسي

لاينكسر وجهك معي

احساسي

اتعب ظنوني ومدمعي

اواه ياداري

راحل اوقف والتفت لك

اواه ياداري

دمعةٍٍ وداعٍ حولت لك

لاصرت في صمتك تلوم

ليه ياظلوم

 

 

 

 

لاتلمس الجرح

لا تلمس الجرح يا معود وصبح عـزوم

البرد فتق ضلوعي وانت دوار صيـت

ضيعت عمري اطاول في حزومي رجوم

وايست اباقول كل الشعر في شطر بيت

لا الوقت وقتي ولا حلومي تطيع وتنـوم

ولا الركايب وحادي العيس ترضيه ليت

ذهايب الذود راحت مع ذواهيـب قـوم

لا صار لك الف قوماني فلك الف بيـت

ترى اصعب الموت موت يذبحك كل يوم

واصعب حياتك تعيش وانت جواك ميت

اواه يا طول عمري لا حسبت الهمـوم

يا كني اكبر من الدنيا ولا قـد شكيـت

علمك دهاني يا لاقي خير خـل العلـوم

اسرجت صفرا من همومي عليها حديت

واطلقت للبيد راحلتـي وفـوق النجـوم

راسي وانا كل راسي تيه فخر و هميت

واقـول للـي يبـي كرامتـي لا تهـوم

لا انته ولا الف مثلك يهدم اللـي بنيـت

 

 

 

 

العاشق اخرطفل او اول انسان
قلبه مثل نفح النسايم على الما
العاشق اجمل طير له كل الالوان
سموه طير الروح تفداه الاسما
وجرح الظنون عيون عنوانها كان
تسرح بعيد ولجلها الجرح يدما
لو عبرت قوافلي كل الاوطان
وشلون ابا صلها وانا دربي اعمى
كان الامل بالوصل له ضوح دخان
اناغدى قلبي رمادوظلما
وكان الفراش يعذب النورتحنان
انا شربت الدمع وبملحه اظما
اغلى الشعور معانق ايدين خلان
فيه الكفوف قلوب والروح تسما
واصعب شعور موادع انسان لنسان
منه العيون تشبه الدمع بالما