ديوان الشاعر طلال الرشيد رحمه الله

موت الإحساس




قالت نصيب وقلت يومك تبيني

غصب على الدنيا ... يدك في يديني

لا تظلمين الوقت وش ذنب الايام

لو اقبل اعذارك يعيي حنيني

غديت ما بين الرجا .. فيك والياس

هذا .. يبي مني وهذا .. يبيني

ان قلت شنت وخاطري طاب كذاب

وان قلت ابيك ارخصت نفسي بعيني

خيرني امري بين اصعب خيارين

موتي انا او موت الاحساس فيني


::

 

 

 

 

لاتلمس الجرح






لا تلمس الجرح يا معود وصبح عـزوم

البرد فتق ضلوعي وانت دوار صيـت

ضيعت عمري اطاول في حزومي رجوم

وايست اباقول كل الشعر في شطر بيت

لا الوقت وقتي ولا حلومي تطيع وتنـوم

ولا الركايب وحادي العيس ترضيه ليت

ذهايب الذود راحت مع ذواهيـب قـوم

لا صار لك الف قوماني فلك الف بيـت

ترى اصعب الموت موت يذبحك كل يوم

واصعب حياتك تعيش وانت جواك ميت

اواه يا طول عمري لا حسبت الهمـوم

يا كني اكبر من الدنيا ولا قـد شكيـت

علمك دهاني يا لاقي خير خـل العلـوم

اسرجت صفرا من همومي عليها حديت

واطلقت للبيد راحلتـي وفـوق النجـوم

راسي وانا كل راسي تيه فخر و هميت

واقـول للـي يبـي كرامتـي لا تهـوم

لا انته ولا الف مثلك يهدم اللـي بنيـت

 

 

 

 

سنا الفضه



جتني..وشافتها عيون حايرات

....ذا شعاع الشمس..او هذا سناها

ضاعوا اللي جو معاها مسيرات

....واقبلت تمشي..تقل محد معاها

ياسنـا الفضه ..وياجيد المهات

....ياشذى نبت الخزامى في وطاها

قلت كن بوجنتكـ زهر النبات

....قالت ان الرمش يجرحلي صفاها

تجرح الظلما عيون ناعسات

....سلهمت واغضت تغطرس في بهاها

حققوا بالشوف في لون الشفات

....هو خذا منها الشفق..واللا عطاها

ولو ظلام الليل يعطينا ثبات

....فيه من لون الشعر واللا كساها

كيف اباصف زين كاملة الصفات

....كيف اباصل في حروفي منتهاها


::

محتاج لك


انتي بكف وباقي الخلق في كف

متعليه في وسط قلبي ولك شان

في غير وصلك مالقلبي ترى شف

محتاج لك يانور عيني وشفقان

لا جابوا اسمك صرت انا تقل مختف

مالي على نفسي الى اطروك سلطان

من غير حبك غضت عيوني الطرف

ياللي جمالك صار للزين عنوان

اريد انا قربك ترى ياغذا الحرف

وان ماحصل موتي ودنياي سيان


::

 

 

 

 

بــاريــس




واحد خايب .. حظه تعيس
سافر تقسيط لباريس
كذّب على ام العيال
رايح ادور عمّال
جمع الورث
حصاد الحرث
وقبل يسافر ياساده
سجّل في نادي كالعاده
يسوي برنامج تخسيس

***

قام يدور شنطة تكفي
وكل هدومه قبل يصفي
عشرة فنايل علّاقي
وشورت وشراب ماقيس
قالت ام عياله تكفى
خذ لبس شوي يدفّي
قال فـ باله يامسكينه
والله قدامي اللي يدفّي
قام يودعها وقالت له
خذ بالك يانور عيوني
وتعوّذ دوم من ابليس
قال فـ باله يامسكينه
وانا من عازمنـــي غيره
ناطرني ابليس فباريس



::

 

 

 

 

ذكرى الفراق


اليوم ذكرى الفراق ومرت أول سنه

اليوم لي عام متغرب وحيد وحزيـن

اليوم أنا ضيف جرحي جيت باطمنه

إني جمعت الدموع وجبت أمانة أمين

ما يجرح الصادق إلا غدر مين يامنه

لاحت من احباب قلبك لا نلوم السنين

مليت من هالاماني دام مهي ممكنـه

لاهي تحقق ولا ياسي بوجهي يبيـن

لو ين أنا وأنت مثل الشمس والأزمنه

مع كل صبح يجدد في لشمسك حنين

لا قلت أحبك أحبـك كنهـا دندنـه

أو كنها وردة ما بين أصابع جنيـن

يا اجمل الناس لك بين الملا هيمنـه

كثير غيرك ولكن مين مثلك ووين؟

يا عاذلي خذ عيوني يمكـن تثمنـه

تشوف عيبه وانا اشوفه ملاك حسين

امس افترقنا وأنا أحسـب أول سنـه

يا طولها ليلة الفرقة سنـه للحزيـن

 

 

 

 

حكوا فيها

حكوا فيها ..

خذوا في طاري الحلوه .. وجابوا..

مسيكينه .. بسيرتها تنابوا..

واظن الصدق لشفاهم .. ابد ماهو قريب..

بشر يامصعب رضاهم .. وانا مالي حسيب..

انا سايق عليك الله لاجل الله يا شامت..

تخلي الشوك من يدك ولا تطرف عيون كحلت بالزين..

لا نامت انا افداها اذا ودك ..

يا هل ترى انتي وين يا بنت الشفاة؟..

انا ادور عليك بصورتك.. وينك؟..

انا كني لمست رداك وايدينك ..

ما شفتك بكل الكلام..

شفتك على سجادتك..

كنك تصلين القيام..

وليلك سرا بعبادتك..

ما اصدقه .. والهرج ابد ماهو دليل..

ما اصدقه .. يا عل يفداك الذليل..

الله يستر خوافيها.. اللي حكوا فيها..


::

 

 

 

 

يابعد حيي


اليوم يا بنت من زيــي = الشمس واردت على ضيي

جيت انتخي بالوجيه البيض = يا عزوتي يا بعد حيــي

الجادل اللي حلاها غيــر = ضيعت في شمسها فيـي

بعيونها سلسبيل رمــاح = والموت بالسود متهيـي

موت وانا اموت انا بالموت = كثيرها غرق شويــي

لا قلت تكفين قالت جاك = وان جيتها فجأه تعيــي

ولا قلت مالي و مال الغيد = قالت وهم بينهم زيـي؟

وان قلت انا تبت مالي كار = مقفي زمانين عن غيـي

قالت وهي تلتفت للناس = طلال موته على يديــي

::

 

 

 

 

يــــاطــــاهــــرة


يا بنت أنا ماني كذا وظنونـك تكّـذب عليـك

كلّي عيوب وماقوت تخجلني ظنونـك وأتـوب

أكذب عليك ودوم أخونك وألبس الأبيض وأجيك

وأعشق معك ألفين وجه ويمتلي صدري قلـوب

أحلى الكلام أقول لك لـو قلتـه البـارح لذيـك

ياقف على شفاهي معك مراهقِِ صـبِ لعـوب

أكذب ولا أدري ليه أكذب أعشقك مـا أرتجيـك

أخاف من صدق الحقيقة في الهروب من الهروب

والله أحبك وأعشقك وأعرف زمان انـي أبيـك

لكنهـا هـذي الحيـاة اتعلمـت منـا الذنـوب

العين عجزت تعتقـك القلـب عيّـى يشتريـك

في السجن خيّال وفي في الصدر رجّال كـذوب

هذي الحقيقة ما يجي في الكون أطهر من يديـك

وانا الذي أنقض وضوء الغيم والمـا والهبـوب

أنقل عيوبي فوق متني وانت لك عيبك شريـك

وباكر تبسم لـي وجيـه لـك يعبسهاالشحـوب

يا طاهره حنـا كـذا المظهـر يكـذب عليـك

يمكن يجي يوم أخجـل مـن ظنونـك وأتـوب

::

 

 

 

 

أحساسي غريب

الـلـيله احـسـاسي غـريـب
عـاشـق وانــا مـالي حـبيب
حـبيت ... كـل الـناس لاموني
حـبيت ... كـل احبابي باعوني
قـلـت احـب الـحب احـسن
قـلـت احـب الـحب اضـمن
لا احــــن .. ولا اتــــوه
ولا بـعـد فــي يـوم احـزن


رضـيـت بـاقداري ونـصيبي
صــرت مـحـبوب الـحبايب
وصــار كـل عـاشق حـبيبي
الــلــيـلـه غـــيـــر
شـــعــوري غـــيــر
اشـــواقـــي غـــيــر
حــتـى الاغــانـي غـيـر
صدري سما .. واحساسي ... طير


بـــس طـيـفك مـاتـركني
ظــل سـاكـن تـحت جـفني
كــــــان وافــــــي
كــان يـذكر .. وانـت جـافي
انــــــت ويـــنــك ؟
كـان هـذا الـفرق مابيني وبينك
جـيـتـني تـشـكي الـزمـن
وجـيـتـك أبـــي أدفـــى
لـقـيت فــي قـلـبي وطـن
ولـقـيـت بـــك مـنـفـى

::

 

 

 

 

تنهيدتين ونار



كـلـّمـنـي عـنّـك

أبعرف كل شيٍ عنّك منّك

قلـّي وش أول جروحك

قلـّي وش آخر أمل ترجيه روحك

إحكي عن طبعك

وعن ربعك

عن اللي يهـزّ دمعك

قلـّي وش معنى الحياة

قلـّي بأنفاسك متى قد قلت آه

إحكّ لي عن الحب

إحكّ لي .. إحكّ لي

إحكّ لي عن الشوق

طـر بـي فوق .. فوق

خـذنـي منّك

وإحكّ لي .. عنّك

الـصـدق

إن الأمل من قبل أعرفك .. كذب

والتضحيه أوهـام

وإني أنا من قبل أعرفك

كنت أعرف أنـام

كان السهـر مـو هـالسهـر

لعب .. و أغانـي .. و إخـتصار

صار السهـر تفكير

صار إنتظـار

صار إحتظـار

صار السهـر .. تنهيـدتيـن ونـار

* * *

يا منتهـى أمـري

بالهمس قلـّي مرّه يا عمـري

وطـر بـي فوق .. فوق

خـذنـي منّك

وإحـكّ لـي .. عـنّـك