من اختيارات بدر الشمال

قناعــتي فـ القرار اللي فــرضه النـــــصــيـب=إظــروفــنا .. ودتـه ..!! واقــدارنـا.. جـابتــــه

.

ولاعــاد باقــي من المشـــوار قبــل المغيــــب=إلا شــعـــورٍ .. كـفــيــل الوقـــت.. بـ إذابـتـــه

.

وعـني رمـيـت احتـمال اطـيب .. والا ما اطيـب=ســؤال عــقـب الجــفا .. ما تـلــزم.. إجـابتـــه

.

درهم أمـــل .. حــازله.. قــنطار هــم ونحــيب=وأخــير من ياســي المـحــكـم عـــلي غابتـــه


.
جــيت اتفــائل لقـيــت الحـزن صدره رحــــيب=رمـيـت نــفـسي عليـه .. ولــجــت إذيابتــــــــه

.

قلت احـتـضـني عن إذلال الســؤال الرهــــيب=وعـن شــح نـفـسٍ علي شـحـت بما اصابـتــه

.

من موت الاحساس صار العشق وجهه كئيب=وحـجـم الالم ماقــدرت اقــرا وش إكتابـتــــه؟

.

اقـنعـني المــوقـف القاســي وانا مــسـتريــب =جــيــتـه عـلى اخــر رمـق مـحـتاج لـ إثـابـتـه

.

ورانــي الصــد وشــلونه .. بـعــين الـقــريــب=ووشلون .. عـمر الوفا .. يقــهرك بإنهابتــــه

.

ووشــلون دم الغـــرام يـصــيـر مـاله طــليــب=ووشــلون حجــم القــــهر بعـــيون طــلابـتـــه

.

وإن انـتــقـام القــلـوب المغــرمـه من حبـيــب =اشــد وطــأه عـلــى المـــغــرم إذا صـابـتــــــه

.

رغــم ان عــشــقي له انهــارٍ بلــيا حسـيــــب=اليــوم يضـــحك على هــمي .. وانا كابتـــــــه

.

لو الالــم كــان مــن خـنـجـر بكــف الغـــريــب=مــاشــلـــت هــم الالــم لــو طــعـنــتـه ثـابــتــه

.

ماعــــاد في وقـتــنا .. شيٍ يســـمى غــريــب=لو يسـحن .. الســم .. بـإبـهامـه .. وسـبابـتـه

.

قناعــتي فـ القرار اللي قـسـمـه النـــــصــيـب=إظــروفــنا .. حدتـه ..!! واقــدارنا.. جـابتـــــه

 

 

 

 

إرفع مقص النقد والنقادي=بادي ورى بادي وليلي بادي
في خاطري شي ٍ ولدري وشهو= مستيسر ٍ فكري ونبض فوادي
تقدح على هجسي بنات افكاري=وخشم الفتيله شب فيه زنادي
الشحن جاري والمشاعر تشحن=وسلك المشاعر بالشعر منقادي
الذود ذودي والوسوم وسومي=والسيف سيفي والشداد شدادي
آرد على العد الرهاوي ..راهي=ولااصدّر الا خابر ٍ ميرادي
أضحك على المجنون قدم اضحك له=وابكي على الماضي وورث اجدادي
(ولو أني أذا ناديت حيآ)=ولكن لاحياة المن تنادي
الوقت غيّر والزمن متغير = والهجري عيا يلحق الميلادي
اقرا عن النسبيّه وراعيها=واكتب عن اهل الدين والالحادي
أكبر همومي ماتعدت كمي=واصغر همومي ذاعت مع الرادي
النار حيه والحيايا حيه = والسم طعمه مثل لونه عادي
فليت في وسط البحور إشراعي=وأرتعت من شوف المحيط الهادي
قلت الهوى والحب ماله خانه=لين ان خلي حط في قيادي
سلام مني يالحبيب الغالي = ياثالث اعيادي وكل اعيادي
يالي عليك القلب زاد خلاجه=والك المشاعر جمرها وقادي
أرفق بحال الي نحيل ٍ حاله = واترك كلام الواشي الحسادي
كم واحد ٍ طب الغرام مكيّم= مثلي وعود مفلس الايادي
كله من الي ينقلون النمه= اهل الكذب والمذهب المتحادي
وانته على ماقيل قدمك ديم ٍ=لابد برقه يسبق الرعادي
اما تتمم في غرامك وصلك= والا بلاشي كلمة ٍ تنعادي

 

 

 

 

يازين قلبي فيك مغرم و مفتون=وحبك طبع في القلب بآلة طباعه
ماعاد يمحى لو غسلته بصابون=وعزّي لقلبٍ لايع الود لاعه
وين انت يامبيّح خفا كل مكنون=مشتاق لك شوق الفطيم لرضاعه
مستدخلٍ حبّك مبا الناس يدرون=وبريت حالي بري عود الجراعه
من عقبكم والحال من دون في دون=فضحتني يالترف عند الجماعه
خليتني مثل المجانين مجنون=وورّخت لك في داخل القلب راعه
حسبي عليك الله ياباهي اللون=ليه الجفا والصد ليه القطاعه
يابو نهودٍ كنّها طلع ليمون=اخذت قلبي من مكانه قلاعه
والقلب عندك يا اريش العين مرهون=ومن طاح بين ايديك ماله شفاعه
ياعين حرٍ عند هزّاع ابن عون=متفهّق الجنحان هجرٍ كراعه
لاسلهمت برموشها الموت مقرون=من شاف هاك العين يعلن ضياعه
والقرن ذيل اللي تشعشع ضحى الكون=يوم ان كلٍّ نجدته من ذراعه
يوم ان هاك الوقت طاعن ومطعون=وعدايل الطمّاع تصبح طماعه
والعنق عنق الظبي والعرض مصيون=بنت الرجال اهل الكرم والشجاعه
حريبهم مايرقد الليل مغبون=ياما سقوا عدوانهم سمّ ساعه
والخصر خمس اقفال والا بعد دون=والخد مثل الشمس يوضي شعاعه
وش عاد خلاّ للغنادير .. مالون=اخذ جميع الزين مدّه و صاعه
امكمّله وامجمّله خالق الكون=ومن الحيا والدين ضافٍ قناعه
واليوم ما اسمع فيه مهما يقولون=وهرجٍ من العذّال ما اقبل سماعه
باب الرجاء مفتوح وابليس ملعون=وماقدّره مولاي سمعٍ وطاعه
الشاعر :مرزوق ابن جريس

 

 

 

 

تلايم الغيـم ياكبـد السمـا هلّـي = وأسقي ديارٍ ظما الاوقات طايلهـا
من عام الاول وانا اللي مابرد غلّي = آدلّه النفـس وآجامـل وآحايلهـا
الحال منسلّ قبل السيـف ينسلّـي = تـواردت كلهـا والمتـن شايلهـا
أما وصلت السما ماهي بتنزل لي = واليا تعديتهـا ضاعـت جمايلهـا
هذي وهـذي وياكثـري وياقلّـي = وأسير في عدلها وأخطيت مايلهـا
أصوم وأدي زكاة المال وآصلـي = ولا أحتمي كلمـةٍ مانـي بقايلهـا
أروح كلي واجي في لازمي كلي = والمقبله ماني ملقّـي قفـاي إلهـا
أقيسها صـح بالسنتـي وبالملـي = والوزنة الوافيـه بإيـديّ كايلهـا
بس الزمن ماضبط دلّه مـع دلـي = صلفات الايـام ورتنـي هوايلهـا
تقبل وأرحّب بهـا وأفـز وآهلـي = وماقدّمت لي فلاني عنـه سايلهـا
سبحانه اللي كتب لي دقي وجلـي = قبل البراريـق ماتلمـع وآخايلهـا
فالحمد لله وأنا بالصبـر متحلّـي = هذي فروض الصلاه وذي نفايلهـا
والله ماغير ربي بـان لـه ذلـي = لـو الجزيـره تواجهنـي قبايلهـا
ماني باآلمّح بقولة ياللـي وياللـي = من راسي اقدح لعاقلهـا وعايلهـا
العلم لأهل النظر واضح ومتجلـي = تفرق سمان الرعيه عـن هزايلهـا
الخبت واطي وراس الرجم متعلي = وأم المحابيل طاحت في حبايلهـا
يجدّ واحد وعشرين الف متسلـي = ماتثبت الحجه ان غابـت دلايلهـا
يامن شكاويه : طال الهجر ياخلي = الهاجره كبهـا واحـرق رسايلهـا
والاّ انتظرها ورددّ شلنـي شلـي = واصبر على مايصيبك من عمايلها
الشاعر:ناصر الأحمري

 

 

 

 

ياطول ليـل الفراق وياكبر جوره
أيامنا غيـّرت .. حتى طبايعنا

في يوم غابت نجومه وانطفى نوره
مدري وش اللي حصل ! لكن توادعنا

لو تدمع العين من فرقـاك معذوره
الدمع وش قيمته .. لولا مدامعنا ؟

القلب مشتاقلك .. والنفس مقهوره
صحيح بعض المواقف مالها معنا

أحلامنا من هذاك اليوم .. مكسوره
وظروفنا للمواصـل .. ماتشجعنا

سود الليالي خذت منـّا .. ومشكوره
أحلامنا .. والغلا .. واللي بقى معنا

اليوم أنا شاعر ٍ ماحس بـ شعوره
ماهمّه ألا البعاد .. اللي ملوعنا

انا معك .. وأجمل اللحظات مذكوره
أيـام كانت .. محبتنا .. دوافعنا

شفني وشوف المشاعر كيف مجبوره
أدوّر الفرصه .. اللي معك تجمعنا

غلاك للحين .. ماهز الجفا .. سوره
ليله من الذكريات .. ومن مواجعنا

اللي خذاني معك بالصوت والصوره
إن كان يقدر يرجعنا ... يرجعنا

لو كان لك قلب مثل الصبح وزهوره
ما ضاق حلم الليالي .. في شوارعنا

محمد البطحي

 

 

 

 

ياصاحبي طوَّل غيابك والسهر والنوح طال=وأنا على شوفك وقربك يابعد روحي شفيق
زودٍ على هجرك وبعدك وانقطاع الاتصال=والحظ الأقشر والظروف اللي لها عييت أطيق
من دونك اللي تسقي الدم الحمر عطشا السلال=في ماقفٍ ما ينعرف فيه العدو من الصديق
ليا ذكرت افعولهم قررت عنك الإعتزال=وليا سهيت أقول أزورك لو أولعها حريق
حطوك في عيني حرامٍ وأنت أحلّْ من الحلال=وخلوني أشكّك بعهدك وأنت أبو عهدٍ وثيق
وأصبحت في بحر الروابع عايمٍ طول الليال=ربع المية يمكن نجيت وباقي المية غريق
تلعب بي أسرار الرجاوي والمناوي والآمال=بين الحقيقة والخيال أزريت يالمجمول أفيق
ماغير أهوجس وأنتظر شوفتك ياعنق الغزال=مثل انتظار اللي سكن غزة لخارطة الطريق!
وش قيمة النفس الشقية كان شوفي لك محال؟=أنا أشهد إن العيش من دونك كذيّا مايليق
ياراس مال اللي ماعنده في حياته راس مال=ياحسنة اللي مات..ماله لا عيال ولا شقيق
كني ملكت أموال وأرصدة الوليد بن طلال!=دامك عشيقٍ لي وأنا لك ياهوى بالي عشيق
ياعين حرٍّ ماكره فـ أعلى شواهيق الجبال=درة بحر مسكانها في غبة الموج الغميق
ماقلّبت في لاهب الكنة ولا جت فـ الرمال=ولا بيّعت فـ أطراف سوق الحب والا فـ السويق
ماهي من القطم القصار ولا النعانيع الطوال=العود ناعم لا متين ولا عريض ولا دقيق!
وباقي وصايفها تعجز من كتب فيها وقال=الزين كبتن والعذارا كلهن عنده فريق
وإن كان ما الله جابها بالسلم والا بالقتال=أبا أنتحر ثم قولوا .. الله يرحمك يابو عتيق!!

 

 

 

 

توعدني الايام بالشين والزين = وانا معاف النفس في شين الايام
وياهيه كان ان القسى غيّب اللين = انا تراني من طويلين الانسام
حسبي على اللي قطع القلب نصفين = ماكنها الا هدة الطير سطام
سوى بقلبي معركه مثل حطين = الظالم اللي بالقسى مثل صدام
حملني الاحزان من عام تسعين = مستغربٍ ياجسم شالتك الاقدام
الله خلق كل الاوادم من الطين = والمفلح اللي فيهم اختار الاسلام
ماهو طرب والله ياقافية ايّن = وانتي كذلك عاد ياقفلتي آآم
بس المهم اللي ابى اقوله الحين = الناس فرحانه على فعل الاجرام
ماهمهم شيٍ حصل في فلسطين = ولاهمهم طفلٍ وقف لحظة اعدام
ابوه ميت من يهودي ومسكين = امه بكت لين البكا صابه الآم
هل هو تخاذل او بعدنا عن الدين = تبي الصحيح الناس تبني فالاوهام
الحين لونه فتح قبل يومين = بنكٍ تعادوا كثروا فيه الاسهام
صاروا على جمع الدراهم مجانين = ماهمهم لو انها حقت ايتام
بعض العرب وقته سهر للملاعين = محصور فكره في جديدات الافلام
وبعض العرب مشغول باله على امرين = اكله وشربه حتى لوكان منضام
وبعض العرب والله مايدري لوين = يسرح ويضوي واي لحظه يبي نام
وبعض العرب يسهر ولا غمضت عين = اسير حبٍ صارله عشرة اعوام
انا ادري انك يا المقادير تدرين = ان البشر ماهمها غير الاحلام
قصايدي ماقلتها قبل عشرين = عفوا انا ما اقول من غير المام
ياسنين لو انك لهمي تراعين = ما ارسلتي الاشهر ولا جات الايام

الشاعر / سعد الجميعي

 

 

 

 

يا موعد العشاق ما فـات الحظـور
عرفـت لحظاتـك وجيـت بحينهـا

حتى دفعني صادق احساس الشعـور
والذاهبه ضاعت ولا ادري وينها ؟؟

لقيتها !! لا شك به بعـض الامـور
تخّـرب الفرحـه علـى راجينـهـا

لقيتهـا والزيـن يـزداد ويـفـور
وتوزعـه بيسـارهـا ويمينـهـا

ولقيت لـي طابـور يلتـف ويـدور
وحجيت لي حجه ولا اعـرف دينهـا

مسكت دور وطافنـي عشريـن دور
كلـه علـى شـان اتمقـل زينهـا

ومرت وهي تمشي وفالممشى غرور
وشحّت علي حتـى بنظـرة عينهـا

وما سمعتني حرف ؟ لو بين السطور
ولا اشـرت لـو بالغلـط بايدينهـا

الله يسامحها .. على هـذا الفتـور
اما عبارات الغضـب .. يـا شينهـا

تخطي واسامحها ولو بان القصـور
ويبقى الغلا من بيني ومـن بينهـا

وان جاتني بفرش لها الدنيا زهـور
ونسكـن بيـوتٍ للغـلا بانينـهـا

وان دبرت فالعمر كلـه فـي دبـور
لو طالـت الدعـوى علـى تانينهـا

اخطيت في الالحان من حب الظهـور
واصعب مراحـل الاغنيـه تلحينهـا

وان جيت اطوفهـا فلانـي بمعـذور
رسـالـةٍ كتـابـهـا قاريـنـهـا

وتبيّـن اللـي كاتمينـه فالصـدور
يا زينهـا فـي وقتهـا يـا زينهـا

احبها من قلب واحسـاس وشعـور
لاشك نفسي مـا استطيـع اهينهـا

((مبارك آل خليفة))

 

 

 

 

الصدر ممحل غرام .. ومرتوي صدّه=والعين غصن السهر فيها ثنى عوده

لولاي رجل ٍ محد وايق على سدّه=فضحني الشوق في باسه ومجهوده !!

أدلّه البال بين الضيق والشدّه=الوقت دوّار .. والأعمار محدوده

لو كل واحد يجي ودّه على ودّه=ماطال صبر العقيم لشوف مولوده !!

راعي القناعه ليا من الزمن حدّه=يرضى بحظ ٍ ذخر جوده وماجوده

يابيض الأحلام لاتمسين مسودّه !!=بشايرك في نواصي الخير معقوده

حي الله اللي عليه القلب من مدّه=كنّه سحاب ٍ يمد يديه للسوده

أبطى وحس الضلوع يقول لابدّه=رجله على الدرب !! وعيونه على العوده

إيّ بالله أقبل جفول الريم من قدّه=يشيل روض الجمال بكامل وروده

كنّه بيجزم ولْه !! وأنا على حدّه=وأغضيت شوفي يمين شوي .. ياكوده ..

.. إليا تمثنى قفص صدري ولا ردّه=ما ياخذ القلب في رمحين من سوده !!

اللي قلوب أكثر العشّاق في يدّه=تسعى لغاياته .. وتطّمح لمقصوده

لو كان ماهيب ورث ابوه عن جدّه=لكنّها كسب حجانه وعنقوده !!

سلمته الروح وأغليته على البدّه=يرعا مفالي حشاي .. ويارد عدوده

من كثر ما أتوق له وأغليه وأودّه=تنقص مقامات بعض الناس من زوده

عليه الأشواق .. محترّه ومبردّه=ويلي على نفحة النسناس من نوده

ما والله أقسى على العاشق من الصدّه=الا أن كبده بحد الموس مقدوده

لكنّه العشق لامن زاد عن حدّه=ياكثر ماياخذ !! وياقل مردوده

أن حطّك براسه .. ونواك من جدّه=مايحترم نفسه !! ولايمسك حدوده

فيه التناقض وجمع الضد مع ضدّه !!=حاجات معدومه .. وحاجات موجوده

الله عطا (السوده) اللي ماعطا (جدّه)=والله عطا (جدّه) اللي ماعطا (السوده)

(((مطلق بن شوية)))

 

 

 

 

بورصه ..ودولارات ..وأسهم ..واكتتاب=وأنا بحالي لاكتبت ..ولاأكتتبت!
صفقات وهميّه يسيل إلها اللعاب =ماتسمع ألاّ كم خسرت؟وكم كسبت؟
لعبه تدورأحداثها خلف الضباب=لازم تجيد اللعب لامنّك لعبت !
أغراني الموضوع ..قلت :أفتح حساب=لكن لما بعده (صراحه)ماحسبت !
قام يتفّتح للطمع مليووون باب =وأنا مع أوّل باب قابلني ذهبت ..
لقيت لي عالم من خيوط السراب=أحسّها تبعد ليامني قربت !
كانت طموحاتي معدّيها السحاب =وفكري بلحظه جاوز الغيم وشربت..
..صافيه لكنّي حدث لي إنقلاب!= وسألت نفسي بعدها بم أصبت؟!
لقيتني محتار في رد الجواب= وأنا ليازارتني الحيره ..كتبت ..
يالله أناطالبك في حسن الثواب= مالي سوى وجهك ولاغيرك طلبت
طالبك تلهمني إلى الدرب الصواب =وسمانها مادام لاصعبها ركبت
ياكثرماواجهت بالدنيا صعاب!=وياكثرماني كنت مغلوب ..وغلبت !
وياكثرمامريت بوجيه الصحاب=وياكثرماني من علاقتهم تعبت !
والوقت لوماطاب يوم ..بيوم طاب= لاتسأله لوطاب يوم ..شلون طبت؟
خذّ طيّبه مادمت في عزّ الشباب= ماانته بماخذ طيّبه لن كان شبت!
وأعلم ..بأنّ المال دربٌ للخراب =لو في عيونك لاجمل ابراجه نصبت !
شف كيف لاجله حثّت الناس الركاب=وشف كيف لاجله ..كم سلبت؟وكم نهبت؟!
شف كيف لاجله تنثني عوج الرقاب=وشف كيف لاجله كم صدقت؟وكم كذبت؟
شف كيف غبنافيه لين الحب غاب =الله ياذاالمال ..منّا كم سلبت ؟!
سلبتنا حتى عبارات العتاب= شف ماأكثرالاصحاب غااابو..ماعتبت

000مستور الذويبي,,,,,