من اختيارات بدر الشمال

وحشتني ما هي تصنّع ولا كذب=من جد واحشني معاتب اعيونك
وحشتني واللي فطر فيني الحب=لك وحشةٍ تجتاح قلبي ابدونك
عايش وكني عايشٍ في وسط غب=كوني وحيش ومصدر الأنس كونك
لعبت في قلبي على ما تبي لعب=ماهو كذا ... هونك على القلب هونك
ونهبت عقلي ما بقى فالعقل لب=مدري دلع وإلا دوافع جنونك
آرد هماج وتارد المارد العذب=أرد ضامي وانت تقطر اردونك
وين الوفا يا ذوق يا عذب يا ذرب=ريقي نشف ما بل ريقي امزونك
وشبك اتعاقب من يحبك بلا ذنب=سدد قبل فرض العقوبه اديونك
تبا تغلبني ابك أنا ماقبل الغلب=مير اقضب ارضك ياصّغير اودونك
وش شايفٍ نفسك عليه أنت يا دب=لا الشمس في يدّك ولا المون مونك
تبٍ لمثلك يا قليل الوفا تب=غيري قطف وردك وانا اجمع اغصونك
وطيت في كبدي يملعون ابالصلب=وانا امتحمل شين طبعك اولونك
أنا شمالي يابعدي والصدر رحب=يشيل ما تعجز تشيله امتونك
حاولت بك لاشك ما عاد بك طب=على العموم أنته بصير بشؤونك
الحب ما هو لا طلايب ولا غصب=لا صرت أنا ماني بمالي عيونك

الشاعر عدنان مرضي

 

 

 

 

القلب قلبك .. والمشاعر مشاعرك=إجرح وعـذّب ياحبيبي حلالك!

غالي ولو تخطي على القلب .. عاذرك=سوّ الذي يرضيك .. واللي في بالك!

خابرني ميّت في غرامك .. وخابرك=تموت في حبّ التملك .. وأنا لك!!

إن كنت صاحي .. مع خيالك أسامرك=وإن نمت .. في حلمي يجيني خيالك!!

يعني على كيفك .. وذوقك .. وخاطرك=أجيك أنا كلي .. وكلي فدالك!!

أموت في غيضك .. وعقدة نواظرك=وأموت في صدّك .. وأموت بوصالك!!

وأموت في همسك .. ليا جيت أحاورك=وفي دهشتك .. لاقلت أدوّر بدالك!!

وأموت لاشع الضيا بأجمل صورك=وأغيب معها .. وألتهي في جمالك!!

وتقول وش رايك؟؟ وأقرّب وأشاورك=أنت الله أعلم وش نهاية دلالك؟!!

ياأني بموت وبندفن في محاجرك=أو يمكن أحيا .. وأنهبل في هبالك!!!

وتضحك .. وتفرج بالسعاده سرايرك=وأنا على ضحكة شفايفك .. هاااالك!!

ذوّبتني مابين ملحك .. وسكرك=وأهديتني قلبك .. وروحك .. وحالك!!

أقدّر جهودك في حبّي .. وأقدّرك=وأسكـّنك بين الحنايا لحاااالك!!

ومنّي جزيل الشكر .. والقلب يشكرك=على سموّك يالغضي .. وإكتمالك!!

سبحان من كمّل وصوفك .. وصوّرك=وخلاّ مجالي يندمج في مجالك!!

إن غبت عنّي قمت أهوجس وأدوّرك=وأنشد عن ديارك .. وأجي وآعنالك!!

وإن جيتني برضاك .. ماجيت مجبرك=يامرحبا .. والقلب فـــزّ ودعالك!

بس أنت تكفى دامني صرت شاعرك=إن غاب زوولك .. لايغيييييب إتصااااالك!!!
الشاعر :محمد السبيعي

 

 

 

 

تمّـر السنين الله يسلمك ويعافيك=وقوّي العزوم اقسى الظروف يتحداها
ماهي مشكله لا اغليت لك واحدٍ ناسيك=مع الوقت والايام ,, تكبر وتنساها
بس المشكله لا اقفيت عني وانا اراعيك=وما قدّرت عينٍ في رجاك نثرت ماها
عطيتك غلاً غيري من الناس ما يعطيك=وسلّمت لك روحي بماها و مرعاها
وبعد صار كن اللي حصل شي ما يعنيك؟=الا وحسافة عشرةٍ هذي اتلاها
الا وحسافه ليت ترجع سنيني ذيك=ابردها وانسى المحبه وذكراها
ابردها و ارد شي ٍ ماهو خافيك=ابرد حبٍ تل روحي من اقصاها
وابرد يوم احن واشتاق لك واجيك=وباقي العباد امرها واتعداها
وابرد يوم ازعل وازعّلك واراضيك=واقول الخطايا من هوى البال حيّاها
وابرد طعناتك وغلطاتك و ماضيك=ولياليك و بيوت القصيده ومعناها
وابرد لك ذكراك لا مرني طاريك=على شان ما اعيش الحياه ,, اترجاها
وابرد يا لبّا عيونك ويا لبيك=وتراحيب روحٍ هزها الشوق واضناها
وابرد حتى جعلني ما اتبدل فيك=من الناس غيرك يا اجمل الناس واغلاها
وبعد جيتني عقب الغياب الله يحييك=لكـْن المحبه والله ما عاد تلقاها
عسى الله يقدينا السنع ونتجمّل فيك=مع عالم ٍ قدام عرفك عرفناها
الشاعر مسفر ابو خشيم

 

 

 

 

يامثبّت عرشك اسألك تثبيت العقول=ماهقيت انّي من الناس , تخلفني فتاه
فارق التوقيت , بين السكينه والذهول=والله انّه , قيس ماشال عن وجهه غطاه
مع تجلّي باهي الخد , للرحمه نزول=نورها طلّة محيّاه في عفّة حياه
من رضى وجهه يلف الرضى وجه النظول=كنّه بأآيات رب الفلق يقرا علاه
لذّة العشاق في قذّة الطرف الخجول=شيب عيني من عيونٍ تشيّب من تراه
النظر في عدل عوده , هوايات وميول=فرصة استمتاع للعين في مالله حباه
مع فروع الطول , عنقٍ يزيد الطول طول=مايقلّد طول عنقه بغزلان النباه
مايليق لواحدٍ غيره ( الريم الجفول )=اشهد انّه فالمسمّى هذا اولى من المهاه
وخلقة المثناه تضحك بسرجوف الذلول=وين ماوجهت ترقا سنود ,, اي اتجاه
وكن عضوٍ منه عن باقي اعضاه معزول=يزعجه في لبس ثوبه , وثّر في خطاه
مشيته مشية كسولٍ تحت حالة خمول=خطوته ثقله , وكن القدم يسحب حصاه
يامخوّل نفسك بجرحي , تقول وتطول=انت راعي جرحي المزمن وراعي دواه
انت بين ضلوعي الحدب ,وتصول وتجول=ماعطيتك غير قلبٍ حمل صادق غلاه
مالغيرك ياهوى البال في قلبي قبول=كاتبٍ فوقه ,, مقاسه ولا ياسع سواه
دام في يدك المسائل وفي يدك الحلول=لاتصير بخيل وصلٍ معلقني رجاه

الشاعر :حاتم البراك

 

 

 

 

كل ما اقطف وردة ارضاه من حديقته = ودي اقطف وردة ٍ غير مع وردة رضاه

مير بعض الورد ماتنعرف طريقته = والحقيقه دون قطفه .. مكّفيني شذاه

من يذمّون الهوى ماهم بـ ( ذويّقته ) = الهوى لولاه .. ماكان للدنيا طراه !

الهوى عن يوم لا ! عن سنه دقيقته = والرجاء في اللي عسى الله لا يقطع رجاه

قال شفت الكون ؟ وش كثر عشيّقته ! = ما وْصلوا منسوب حبك ولا لحقوا مداه

يوم غبت وبان شوقه على حقيقته = بعد ماضاقت بي الارض من كل اتجاه

قلت كني ( من ظروف الحياه معيقته ) = قال انا اللي كن ماني على قيد الحياه

راح قلبي في يدينه كما وثيقته = ولا قدرت اطالبه فيه يوم الله عطاه

لو اضحّي .. وارمي العمر في حريقته = خابر ٍ مانيب فـ ( ارضه ) ولاني في سماه

ودي وودي وودي على ترويّقته = لين ينسى همومه اللي كما جبال السراه

الله يعافيه .. والله يجلا ضيقته = وجعلني ما اذوق حزنه ولا اشكي من جفاه

مشعان البراق

 

 

 

 

دق ناقوس المشاعر وابتدى وقت المسير =جيشي اللّي لاوقف عند المواقف قدها


ماحسب لام المعارك لو رحاها تستدير=والغنايم ماتهمّه لو كسب ماعدها


عارفن وش هو مصيره قبل تقرير المصير=مايفاوض في حقوقه والمنافذ سدها


ماسمع راي المنافق والمغرّر والحقير=دام عزمه يقطع البيدا وياطى خدها


مارضى فقر المعاني لو بقى غيره فقير=وان هجم غيره تحصن بالحصون وصدها


يكره الزحف الصغير ويرغب الزحف الكبير=فاهمن غدر البحور وجزرها مع مدها


لو يشاور مايشاور كود رجالن خبير =لارتخت بعض العلوم بطيب عرفه شدها


عمره اصغر من مقامه ماينادى بالصغير=دام سيفه من سيوفن ماتـثلــّـم حدها


والله اعلم بالمصير ان كان شر او كان خير=قسمه الله فـالحياه ومابه احدن ردها

 

 

 

 

عن خاتم الرسل الشفيع الرحمه الحق النذير = صلى الله وسلم على روحه وصحبه وآهله
اطهر بشر تباشرت بقدومه الدنيا ..واخير = حيّ ٍ تهادى فوق الارض .. وخير ميّت تحمله
نذب شعر .. ونشتعل غيره .. وتأنيب الضمير = يفجع سباته كل حرف من الحروف المنزله
نعم نحبك ياحبيب الله يالنور ..البشير = فدتك روس اموالنا وارواحنا .. شوق .. ووله
زفرات حبك في شهيق الصدر وانفاس الزفير = في كل لحظه تطرق ابوابك وتقطع مرحله
مليار واكثر نسكن الارض وخطاوينا تسير = على ثراها مقفيه تاره .. وتاره مقبله
مليار واكثر بالعدد .. والناتج الفعلي صغير = لو اجتهدنا في عددنا مايجي .. قيد انمله
يقودنا على ملذّات الفتن سلك الحرير = واللي يزوزي بقربه .. واللي يدرهم بجمله
على صعيد الواقع المكشوف واقعنا مرير = مع الجهات الاربعه ذل وهوان ومهزله
ابطال .. في سرد العصور الماضيه فقط لاغير = جهّال في الحاضر وحاله والبطوله ارمله
رجال .. نجبر ساعة الشدّه عنا العظم الكسير = لكن ليا منا وصلنا لك تضيع المرجله
وان عودت عواقب الدعوى عبوساً قمطرير = رحنا غثاء كغثاء السيل لاسال اوله
والمسألة ماهيب قاطع منتج .. ورجّع سفير = لا المنتجات المسأله .. ولا السفير المسأله
المسأله مع منكر وتغريبة القبر .. ونكير = وأصل الاجابه عن شباب المسلم وراس عمله
على اي شي افنى الشباب بدورة العمر القصير = قبل يتضوّر هادم اللذات جوع وياكله
في إصلاح ولاّ علم ولا ّرفع ظلم وبث خير = ولاّ لحق ركب التطوّر .. في صناعة قنبله
آية أعدوا ما استطعتوا .. جت بالاعجاز الكبير = عن مبدأ القوّه تداعت بالصور والامثله
القوه :- إعداد العتاد .. ووأد جهل .. ورفض كير = والبدأ من حيث انتهى الغير .. ونضوج .. وغربله
هذا سلاح الحب في منظومة الوقت الاخير = والي يحب يعدّ عمره بالسلاح وينقله
العلم نبراس الامم .. والصبر مشكاة الضرير = والاخذ بالاسباب مفتاح الحلول المقفله

الشاعر: سلطان عناد

 

 

 

 

مبطي وانا بيني وبين الهواجيس = وقفة تأمل .. واستراحة محارب
عجزت لا افهم وش تقول الكوابيس = في كل ليل تمرْ .. والها مآرب
من حقي اوزن كل ما فات .. واقيس = واشمر ذراعي .. واسدد .. واقارب
وكان البحر قدمي .. وخلفي تضاريس = وبموت من حيتان .. والا عقارب!
سلّمت صدري للهوا والنسانيس = وسوّيت من نفسي لنفسي تجارب
شاعر معاناه .. وعذوبه .. واحاسيس = ومصامخٍ بين اللحى والشوارب
حتى ولو اعيش خلف الكواليس = تعرفني الاجناب .. قبل الأقارب
ثبّتْ عرشي .. بين كسرى وبلقيس = وانهار كسرى .. وانهدم سد مارب
وان كان مال الميل .. دون النواميس = رفعت كفّي لله وقلت ..يا رب!
لحّفني .. بشِدّة هل الخيل والعيس = اللي لها يوم المضارَب .. مضارِب
وجنّبني من ابليس .. وامْجالس ابليس = ابليس حربه حرب .. وانا مُحارب
انسان تغريني المظاهر وانا .. ليس = الاّ ! .. ضعيف ومنك واليك .. هارب
احلم .. ومن حلمي اشب الفوانيس = واصحى .. على وقع الفتن والمكارب
هذا زمان الدرس .. من غير تدريس = ياللي ليا هالحين .. تعمل تجارب
ان شفت بيضة ديك .. والا لبن تيس = حاول تصدّق عينك .. ولا تغارب!

الشاعر:خالد الحصين

 

 

 

 

ياناشدي لا اضحى حريبك قريبـك=وش موقفك لاجاك بردك من غطـاك
لابان لك مـن مامنـك مـا يريبـك=ياكُبر والله يا ابيـض الوجـه بلـواك
موتك اليا جـاك البلا من طبيبـك=تبي الشفا من ايـده وبالسقـم داواك
شريك عمرك في شبابـك وشيبـك=رفيق درب وباخصٍ في خفايـاك
جاك متحامل يـوم عنـده وشِي بـك=واقفى يتهجا ما بصفحة خطايـاك
في موقفٍ مـن ذاك مـا ينحتسي بك=خـلاك تقفـي ناقـلٍ داك بــرداك
ماعاد ينفعـك الشمـات بنصيبـك=اليا اختلف ميزان عرفـك بدنيـاك
قل ول يـا رجمٍ نكـرت لرقيبـك=صارت وعر دربك عقب زين مرقاك
اقسمت يارجم الـوزا ما انثني بـك=شانت مراقيـك وجفـنّي شغايـاك
حلفت عقب اليوم ما ارقب جذيبـك=والله مـا عدّيـك لو زان مـبـداك
لا نته بمرقابـي ولانـي صحيبـك=ياناكر المرقى لمرقبـك وش جـاك
يانابي المرقـاب جـاوب غريبـك=يستودعك خير وعلى خيـر يلقـاك
والله لوسالـت مصامـد شعيـبـك=تحرم عليه بلّت الكبـد مـن مـاك
عقب الشرك طوّى حياضه شريبـك=النفس طابـت واستـدارنّ الافـلاك
ياناشـدي لا شفـت مايستريـبـك=لو من حدى عيالك تحـزم بشلفـاك
صبـرك لحيٍّ دون حقـك يهيبـك=عـارٍ علـى وجهـك وذلٍّ بدنيـاك
لاصار ما تنحى الشرع عن قليبـك=تقفي من احياضك عطاشا ظماياك
لا صار مابيـدك تناصـف جذيبـك=ايط الوطى قبل الرجاجيل تـاطـاك
ما قفـك بالحقـران مـا يستوي بـك=والمتقا عيبٍ ايـلا بانـت اعـداك
واوصيك مبهوض الخفى لا يعدي بـك=نجس المواطي كل ماجاك ناجـاك
يقول لك واليـا فـقـدك يحكي بـك=لا غبت عن عين الربـادي تـولاك
ولا تعتزي برجـال مـا تعتزي بـك=لاهمّهـا طيبـك ولاهـي بحسنـاك
ايلا اختلف ميـزان جايـز هذيبـك=بان الخصيم وقبـل غيـره تغـداك
لا تعتزي بالخلـق واقعـد لبيبـك=واطلب من المولى على الرشد يقداك
اتبع رضى المعبود واطلب نصيبـك=لا طاب حظّك طيـّب الله مسعـاك
وحذراك لا تغويـك غفلـة رقيبـك=تراك ما تخفى على عيـن مـولاك
بيديك شد احبـال مـن لا يسيبـك=اكرم كريمٍ ما يمنّك ايـلا اعطـاك
ولا اشتد حبل الهرج وقـّف طليبـك=مهمـا تعالـت مونتـه لا يتمثنـاك
لا تنتحـي بمجـاملـه يستصيبـك=ياخذ قضاك ويلحق بدلوك ارشـاك
دامـك لشـدات الزمـن ينهقي بـك=عن عز نفسك لا تنوّخ مطـايـاك
اعـزم ولا تبـدي مكاميـن غيبـك=حذراك لاتبـدي لحيٍّ خفـايـاك
الا لعـزيـزالا ندبـتـه يجيـبـك=وايلا انفتح له مسلك الخيـر نـاداك
شبلٍ ايـلا بار الزمـن ينتخي بـك=وان صارلك حقٍّ ورا حقـّك اوفـاك
وان غبت بين الخلق مـا يستغيبـك=وعمّا يريبك طيب السـاس يـدراك
ياذيـب لومالـك بغفلـة حريـبـك=عجل على حطـت يمينـه بيمنـاك
ياذيب لاجاوبـك بالصـوت ذيبـك=ارمس على حسه الا جاز مسـراك
ذومل ترى صاحبك يعـرف هذيبـك=ترى العشى وان نمت ياذيب ماجاك
جد بهذيبـك مـع مباطـن غبيبـك=تراك ما تظفر الا الصبح فـاجـاك
دسّم جنابـك مـن فوايـد خبيبـك=وحذراك ياذيـب الذيابـه تعشـاك
حـذراك هيسٍ بالطمـان يعدي بـك=يترك لك السيـّه ويقفـي بحسنـاك
من باع بك لـه ساعةٍا يشتري بـك=ذلٍّ ومـن ذلـّه عـن العزّ ينـهـاك
اوصيك لو مخطيك ماهـو مصيبـك=قدرك لزوم انـك تشوفـه بدنيـاك
بالـك مغبّة مكسبٍ يرتهيـ بـك=تنسى ضميـرك فيـه والله ينسـاك
خف واحـدٍ بالليـل يسمـع دبيبـك=لا تقطع حدوده و ناجـه برحمـاك
وحذراك من صاحب وصاةٍ يليبـك=لا اصبحت ناظر بك ولا امسيت مسّاك
لابد لـه مـن ساعةٍ يلتهي بـك=مهمـا تمادا بـك يـردك لمـثـواك
لاشك لملـم مـن شذايـا ذهيبـك=واحسب لآخرتـك وقـدّر لدنيـاك
واولى الخلايـق والدينـك بطيبـك=اسع برضاهـم طيـب الله مسعـاك
اكسـب محبتهـم يحبـّك حبيـبـك=ربٍ علـم باسـرار خافـي نوايـاك
وخالك وابن عمك واخوك ونسيبـك=اسع بوصل رحمك وكـرم عنايـاك
وافطن ترى البادي بطيبـك طنيبـك=كرم جنـاب الـي بـه الله وصـاك
بالـزود كانـه بالمراجـل لعيبـك=يكرمك لا جيته وتفرح اليـا جـاك
هاذي وصاتي جعـل ربـي يثيبـك=يا ناشدي جعل الردي مـن فدايـاك
ومنـي صـلاة عـد مايستريـبـك=يا خالقي يـوم الوعيـده ويخشـاك
عليك يـا خيـر العبـاد وصحيبـك=عد الغمام وعد مـا يـورق الـراك

الشاعر:محمد دويشرالنصره

 

 

 

 

لاتتهمني بجرحك يالغزال المليح = ولاعاد تشره وتلحقني عتاب وملام
في ذمتي ماجرحتك مير كانك جريح = جرح المحبين ماهو مثل جرح الصيام
عزالله اني ماقلت الا الكلام الصحيح = لاعودة للكلام اللي عليه الكلام
انت استغليت طيبة قلب رجلً صريح = لاحب ضحى بروحه في سبيل الغرام
انقذقك من جور وقتك وانت قبله طريح = في وحشة همومك ولا انت بـ .على مايرام
واهداك قلبً رغم جور الزمان الشحيح = ما يحمل الا الوفى والقدر والاحترام
قال انت بلحالك اللي فيه مير استريح = وهاك المفاتيح فدوه لك وهاك الزمام
انصح معك يحسبنك مثل نصحه نصيح = واثرك تنظر جنوب وبارق الوسم شام
ثلاث مرات من عيني تقوم وتطيح = والرابعه طيحةً ماعاد فيها مقام
مع السلامه واخذها باللسان الفصيح = واسلم وسلم وعشرتنا عليها السلام
لكن ابنشدك عن حاجه وعدّ الصحيح! = تضييع وقتي معك حلال والا حرام؟
الشاعر :عبدالله بن قنيص