(يازين فنجالٍ على الصبح منشاه)

يـازين فنجــال على الصـبح منــشاه
فنجــال كيـفٍ لاهل الطـيب ينـساق

وشبيت نـــار بـجــرم سمــرٍ تمنـاه
بوجـــار ادلالــه كــمـا ضـوح بــراق

وحمـست بــنٍ فـوق جمـــرٍ نقينـــاه
نقـوة يــدي مـن أجــود البـن ينـذاق

وادن (نـــجرن) كنــه الذيـــب بعــواه
صوته يجيب اللى على الكيف مشتاق

بـدلال صــفر حـفـت الـجمر مـركــاه
بوجــار نــارٍ صـلـوها يحــرق احــراق

وبــراد شاهــي والحـلا به حكـــرناه
يطـربلـه اللـي عامي الكيف لا ضاق

فـي بيــت شـيّــد للمسـايير تلقـــاه
وجمعـت نشاما مابهم كـذب وإنفاق

واللــي يجيــــنا بالتــراحيب نلقـــــاه
ترحيب من صادق ضميري و الاعماق
#
سعــــود بــن معــــزي العــواجي
⚡⚡⚡⚡⚡⚡⚡⚡⚡⚡
يامسوي الفنجال لاتزيـد في مــاه
ولايصير ني ولاتـبـالـغ بـالاحــراق

والحب من خولان لـو زاد مشــراه
وبـهــر بهيل زاد سـعـره بالاســواق

مـع زعـفـران صـاحـب الـذوق نقاه
يعـرف مزاج اهل المعاني والاذواق

الياصبها الي جعل ماتـعـاق يـمنـاه
مثل كـلام البـاهـلـي تـقـل شـبـراق

في دلة البغـداد طـبـخـه ومـجـذاه
فنجـالـهــا لمـدور الكـيـف تــريــاق

وصبـه لقـرمٍ تـبـذل الـجـود يـمـنـاه
الي بـطـلـبـات الـمـقـلـيـن مـاضــاق

وصبـه لليثٍ ﻻبـتـه يـحـتـم حـمــاه
مـجــربٍ فـعـلــه بيبســات الاريــاق

وصبه لـمـن طـلابــة الـحـق تـنـصاه
حـكـيـم راي بـين الاخـصـام فــراق

ذولا النوادر ياهــل العـرف والـجــاه
الي لهم كيف الـشـغـامـيـم يـنـسـاق

وبـاق الحـثـال حثالهـا قـدر شــرواه
قـهـوه مـن الـثـنـوى بلا قدر وقـنـاق
#
طالب ونيس السلمي العنزي
⚡⚡⚡⚡⚡⚡⚡⚡⚡
حي الحشيم الي هل الطيب تنصاه
سمــح المحــــيا للجزيلات عشــاق

مرحـــــوم عودا" على الطيب رباه
وجمع مع فعل الطيب سمواللاخلاق

ونعـمٍ(ابوســاجر) ونعـم بشــــرواه
(ابن معزي) جعله ابطيب الاوفاق

راعـي معاميــل" نضــيفه معــباه
ينقــالها من غـالي البـن مـــــالاق

فنجــال كيــف وراعي الكيف سواه
عطـر المهيــل بالمعامـيل شـــعاق

وبالزعفــران وجـوزة الهنـد تشعــاه
نفحت شـذاها جاذبه لهل اللاذواق

ينساق لــرجلٍ ماتـردا بمـن جــــاه
عـــود يمـينه للــمراجل والانفـــاق

لامـــد مده مــايحسب عطــــــاياه
مــدة كـريم لبسطة الكـف عشــاق

وسوقه على اللي كل ماجيت تنخاه
يرخــص بعمـره لهل الغـي صفــاق

مثـــل الـــزناتي لاتــوشح بشــــلفاه
يصيـر مثل الـموت قطـاع الاعنـــاق

وابـعـد عن الــنمــام وخلـه ابلـــواه
خبيث قلب الاغيبت الـربع ســـراق

واقصـر عن اهـل البلـبله والمــلالاه
اهـل دوادي جـعلها بالــف طقــاق

كثرت لجاليج ن على السمع ماذاه
ودايـم تـلاشا لاوصـلت ل ام حقاق

وسـوقه على اللي مــابطيبه مراواه
الـــي مثل هــاذا له الـبن ينســاق

رجـال المعالي قمة المجد ترقــــاه
اهل الجمايل من اصيلين الاعـراق
#
خليل مسفرالطلوحي
⚡⚡⚡⚡⚡⚡⚡⚡⚡
حي الرفيق اللي على الطيب منشاه
وحي الدلال وصافي البن لانساق

في مجلسن دوم الرجاجيل تنصاه
على الهلا واهلين والكيف منساق

بيدين منهو طيب الساس مجناه
كيف النشاما من عريبين الاعراق

جمع الجماعه والوفي حي ملفاه
كلن على الجزلات والطيب تواق

ياسعود ياعذب النبا وين نلقاه
ماعاد هي عقب الفجر قبل الاشراق

ولاعاد هي عقب العصر دوم تلقاه
واليوم صارت في تراميس واوراق

من واقد الافران تجذي معباه
لاهي لنا بالكيف ولاهي بالاعماق

ياسعود وجدي وجد من عافه اتلاه
اهل البيوت اللي على طنب ورواق

طبع البداوه غاية القلب ومناه
تلقا بها الكيف الحمر طب واعشاق

وجدي عليهم وجد لولا ولولاه
اقفت ركايبهم على حزن وفراق
#
عبدالمحسن بن عوض الغضوري
⚡⚡⚡⚡⚡⚡⚡