رحله في قصيده الموال العراقي

نعرف جميعنا ان للموال العراقي تاريخه وعذوبته وشجنه الذي لا يخلو من الطابع الحزين..وهذا موكد ان ذلك يرجع الى ماضي المنطقه والى الصراعات والحروب والمشاكل التي تعرض لها العراق ومازال يتعرض لها الى يومنا هذا....ونحن الان نقتطف من كلمات الموال والجوبي العراقي هذه القصائد اتمنى ان تنال رضاكم.

دكتور


دكتور بيا الم
لا هو عشق لا هوا
ماتنعرف حالتي صعبه
ونيراني ماتنطفي والقلب فيه انكوى

ويادوا توصفه للي يحترق يا دوا
وقلبي رواه الحزن وغير الحزن ماروى

وصبلي كل الدوا ماطيب لو شربه

ظلمه اصبحت حياتي مابيها ومضة ضوى
حال الضرير اللي ضايع عليه دربه

ياحال خيط الشمع حالي وحاله سوى
مدفون هوى عدل مايعرف بذنبه

ياللتعرف لكل مرض ممكن تلاقي الدوا
اوصفلي وين الدوا وينه اللي يعالج الغربه
___________________________________


ساعة وتغيب الشمس
ساعة ويجيني الليل
وينراد حيل ودمع
ومنين اجيب الحيل

روحي حمامة صُفت
وب بيت اهلي تدور
اشتاقيت لامي انا
ولخبزة التنور

بديرة هلي بالطعم يختلف حتى المي
وحتى الهوى يم هلي يختلف والله هواي

كل ليلة تسوى العمر
لو قعدوا اهلي وياي
ومن ايد امي الصبح
محلا استقاني الشاي

يامنطقتنه حلم ارجع لاصحابي
كل ساعة صاحب يجي
ويدق عليي بابي
محتاج محبوبتي
الحلوة ام جفن غافي
واتمنى هسى تجي
وتغفى على كتافي

مشتاق للمدرسة
للجرس والساحة
اطفال نركض ركض
بس نشعر براحة

اش مادار بي الزمن
ابقى ل هلي ميال
ومنين اجيب قلب
يتحمل الترحال

__________________________________________________ __



مثل أختك
مثل أختك كلمة قالتها ومشت دون انتظار
مثل أختك وأنا غير الصبر ما عندي اختيار
يا ما يا ما بشوقها سهرت الليالي
وصلتني للعدم دمرت حالي
ومن شرحت أشواقي قالت باختصار
مثل أختك وآني جداً آسفه لهذا القرار

أشقد بنات اللي صادفوني
وما خطر على البال أحب
هي بس هي في خيالي وبيدها صار القلب
ليش عفت الماي وتبعت السراب
ليش ضيعت العمر بأول شباب
مثل أختك وآني جداً آسفه لهذا القرار

*****************************

على حبك مالي رجعه




على حبك مالي رجعة ضاعت الفرصة من اديك

ولو شفت بعيوني دمعة لا تظن أبكي عليــك

وسفة يا مضيّع سنيني تبيعني ومـا تشتـريني

وهذا آخر ما أقلك لا تيجـيني ولا أجيك

على حبك مالي رجعة لا تـحاول وانسى دوم

ما بقى لك عندي كل شي
وبعد ما أحمل هموم

لا تخلي الذنب بيه ولا تحـملني الأذيـة

أنت جبت النار بيدك وانت بيها احرقت ايديك



وهذه مقاطع منموال عراقي لحبيب يعاتب من يحب فترد عليه ويرد عليها مرتاً اخرى



عتاب الشــــــــاب للفتــاة
بهاي عيوني شفتج لا تنكرين
وهذا الوجه ما يخفى عليّه
مو انا اللي شفتج .. لا تقولين ..
اميزج لو كنتي بين ميّه ..
صحيح وياج ، جايز تغلط العين
بس القلب شافج قال هيّه
اقولج وين شفتج اذا تريدين
بالمكان اللي كنا نقعد بيه سويّه
واقولج حتى انتي شكنتي تلبسين
من شفته عليج شصار بيّه
يُـبَـه.. نفس الثوب هذا اللي قبل شهرين
جبته بعيد ميلادج هديّه
وهاي الساعه بيدج ما تذكرين
جبتها بسبب تأخيرج عليّه
المحابس و التراجي و كحلة العين
نسيتي آنا جايبهن بايديّه..
قناني العطر كانت وحده و اثنين
او سويتج صدق اجمل بنيّه..
جبت لج كل شي حتى انتي تتحلين بيهن مو ليّـه
حصت غيري صاير تعب السنين
وانا بس المشترى صاير عليّه .. .. .. ..
********* جواب الفتــــــــــــــاة *********

صحيح انا اللي شفتها وانت مو غلطان
بنفس الثوب هذا اللي جبته ليّه
وصحيح انا كنت و يا شخص ثاني
وما انكر . اقولك آني هيّه
صدق كل اللي قلته
ما انكر .. صحيح جبتهن كلهن ليّه
بس آني انطيتك قدهم اضعاف
حنان و لهفه و لوم الناس بيّه
كنت اشقد اجازف من اجي لك
واتحمل حجي امي عليّه
الاشياء اللي جبتها .. ألك انت البسهن انا وتتباها بيّه
جبتهن على ذوقك مو بذوقي لبستها لخاطرك ، ما تلوق ليّه
هداياك اللي قل لي وش تساوي
شو توازي شبابي أي هديه
انا انطيتك عمر سلمته بيدك
بساعه و محبس .. تمِـن عليّه
وجاي اليوم اللي تعايرني بيهن
اظن عمرك ولا مقدم هديّه
وانا ما شفت منك أي نتيجه
وصارسنين اريدك تحس بيّـه
شفت العمر يجري وكل شي ماكو
قلت الحق بنفسي أنا شبيّه؟
من أظل وياك يتركني قطاري
بأخر لحظه صرت آني ذكيّه
جبت لج ما جبت لج هذا همك !!
لكن ترتبط ما إلك نيّه
اما الشخص هذا اللي كان وياي
اعتبره انا اجمل هديّه
من اول يوم عرفته
حسيته صادق .. إجانا لبيتنا و يطلب أيديّه
وقارنتك انت وياه مرات
شفت الـقـلـب يـمّــــك
لكن الحب حبيبي بهذا الزمن .. عشره بالميّه
والتسعين انا بحاجه إلهن
زواج واستقرار و أحلام ورديّه
لذلك قررت اختار غيرك
مو حقك تجي وتلوم بيّه
واذا انا قبلت قبل بهداياك
اسمح لي ارجعها الهديّه
ترا بخاتم الخطبه تزهي ايديّه .. .. .. ..
*********جـــــــــواب الـشـــاب *********
قصتنا انتهت وكل من طريقه
ضعنا و ضاعت ويانا الحقيقه
ولو عني رحلتي و عن عيني ابتعدتي
مشيتي وما صبرتي
ندم واللوم روحي ما تطيقه
زمن راد انتفارق مو بيدينا
كل واحد تحت نجمه صفينا
الف مبروك ليج .. والهم ليّه
سعاده انشاء الله وعيشه هنيّه
صحيح اثنينا كل من ظروفه
قدر .. حكم القدر لابد نشوفه
يا دنيا اللي راح ما يخطر على البال
مرمرني كلام القيل و القال
والف مبروك ليج .. والهم ليّه
سعاده انشاء الله وعيشه هنيّه
************************************************** **
الشاعر كريم العراقي
موال غرفة المكياج


دعتني لغرفة المكياج

أتمتع بزينة

انت مريتي قالت

وبدت تلعب بريشتها

تتفنن بهالألوان

وعيوني مرايتهاوسألتني تعال اهنا

اشلون بشفني الأحمر

قلت يا عمي شفايف هي

لو ياقوت لو سكر

سألتني عن الكحلة

اشلونه برمش أسود

قلت هي حواجل هاي

لو سيفين لو مبرد

ارحميني يا بنت الناس

أنا صبري انتهي هالحد

أنا رجل فلاح والتفاح

فوق الخد صعر اتحول مرايا

وأنا مجنون يابا على الجد

لأترك غرفة المكياج فورا

لأن صارت جد

************************************************** *****

غريب وكل غريب يتذكر اهله .....

يادنيا إنتي الحرمتيني من أهلي
سكنت الغرب من غصباً عليّ
ادق يا باب واسال من عليكم؟
ضعف صبري وزماني خان بيّ

شوصفلك غربتي , صدري مخنوق صوتي مبحوح
دفنتوني بغرب وتعالج الروح

غريب وكل غريب يتذكر اهله

الام الحبيبة والدي الحبيب اخواني احبابي اصحابي جيراني وفي البيوت
وك من غيركم دنياي تابوت
عذاب فراقكم كنه المنيّه

هلي احباب قلبي هلي
تذكرون الصبح وانتم تفطرون؟
بعدها صورتي تتوسط البيت؟
المكان اللي احبه بعده موجود؟
حديقتنا بعدها محمله ورود؟
والاغاني اللي أحبها من الطفوله لأم كلثوم ولناظم الغزالي
وللكبنجي حنيت
لبوذياتنا ومقاماتنا عتاباتنا وسحر المواويل
للمقهى القديم وشاي ابو الهيل
بحضن دجله الزوارق هايمه تطوف
ونيران الشواطي وسمك مسكوف

الله ينتقم منج ياايام هلي الطيبين ضاعوا من اديَّ
بيش اعوضهم ياربي وانا قلب الطفل قلبي
من يجي براسي هواهم يحرق ثيابي العليَّ
اقرا آيات ودعائي يهون الغربه عليَّ
كل صوركم بكت يمي
افرجها ربي شلون بيَّ
حقي لو اضعف شسوي الارض مو ارضي
الناس مو ناسي الجو مو جوي
يصير اذل نفسي واشكي لعدوي امري

___________________________

موال الليله وحدي...
رآح وبعـد شيفيـد دمعـج يآعيــني ومـن البجـي أترجآج كافـي ارحميني
رحـت وخـذتهـآ ويـاك روحي التـريدك دم أنـي يالمحبــوب وأمشـي بوريـدك
بعـدك حيــآتــي أتصــير مالهـآ معنــــي يآقلــبي ويــن أنــروح ضعنـآ يـآكَـلبي
الليـلة كـل النـآس تبجـي علي حالــي بدونك يآشمـس الروح ضلمـة الليـآلـي

الليلة انام الليله وحدي راح اليحط خده علي خــدي
ياخذني ب الاحضان وارتاح وادري الدمع ميرجع الـي رآح
وينة ومكـآنه خالـــــي عنــدي ..
ع الغيـــبـة أبد مـآ عـــودتــنــي ...وينة ومكانة خالي عندي
يــآمحلــى صـدرك نومــتنـي ...وينة ومكانة خالي عنـدي
تدري بغـيآبك عـذبتنــي وينـة ومكـآنـة خالـي عنــدي
مــو رآح امـوت و وينـك اليــوم ...وينة ومكانة خالي عنـدي
وعيــونـي بعـدك عآفــت النـوم ...وينة ومكانـة خالـي عنـدي
وشـلون نـومـه ألـكَـلبـه مهمــوم وينـة ومـكآنـه خالـي عنـدي

موال (اهلك) ...


اهلك بحبنا درو وانساك رادوني
ومن شوفتك يا حلو رادو يحرموني
والشوق اخذني الك بالصدفه شافوني
قالوا بعد لاتجي من الدرب منعوني
هزني الحنين وصحت باسمك وسمعوني
ما عندي غيره محب ما عوفه صدقوني
خلوني وسط الجمر وبناره حرقوني
بس انت ظل مطمئن ما تحترق صورتك لو حرقوا عيوني
________________________________________________






وهذه مقتطفات من شعر الدكتور الفنان سعدي الحديثي
يا ساعَه يا يُوم كِلّي يا شُهرْ يا سَنَه
إنْظَلْ برِجاكُم يو لا يِنكطِعْ ياسَنا
إسْأَلْ طِبيبِ الّذي بحالِ الوِلَم ياسنا
ما خَبّركْ بصْواب كلبي؟ اشْكال؟
صندوك كلبي إمتلى مِنِّ الهموم أَشْكال
لا يَا لّئيم اللي ما تبالي بِالزِّمان إشكال
كلي الفرَج.. يا ساعَه يا يُوم كلّي يا شهر يا سنه..

*********************

هَذوله إحنَه سَرَجْنا الدمْ عَلَه صْهيلْ الشِكرْ يـَسْعودْ
خَلّينَه زِهرْ لِنْجومْ مِن جَدْحْ الحِوافرْ سودْ
تِجّادحْ عْيونْ الخيلْ وِعْيونْ الزِلِمْ بارودْ
وياخذْنا الرسَنْ للشَمِسْ مِن زودْ الفرحْ وِنْزودْ
يَسْعودْ إحنَه عيبْ إنهابْ، يا بيرغْ الشرجيَّة
خَلّه الدمْ يِجي طوفانْ، كِلنَه إنخوضْ عِبرية "
**********************
نطيت رجمٍ وثاري الليل ماسيني
بْدّيَرْ غربه يْعَلّي السيل ما جاها
اضحك مع اللي ضحك والّهَمْ طاويني
طَويَة كْربْ الطلَبْ لو وشَّلو ماها
علامِج ما تِذِرفينْ الدمع ياعيني
على هَنوفٍ جِديد اللبسْ يزهاها
هبتْ هبوب الشمال وبردها شيني
ما تِدْفي النار لْيا حِنّا شعلناها

******************

يا عابرْ الليلْ لديارْ الأحبها ترِدْ
ما تفعلْ الروحْ عنْ اللي تِريده ترِدْ
كلْهمْ لَهَنّه ريامْ الْ علْمِنابِعْ ِ
ما تشربْ الماي إلا رايك وجاري.
وآنا على الدومْ حافظْ لابتي
وجاري
لا كولْ ويلي ولا اشچي العليّ جاري
مطَّمنْ ومعتِقِدْ ذيچ الليالي تِردْ .


منقول

 

 

 

 

مشتاق للمدرسة
للجرس والساحة
اطفال نركض ركض
بس نشعر براحة

ابدعت وتألقت وهذا ليس غريب عليك اخوي صالح
ننتظر ما تنثره هنا من حروف لؤلؤيه وجميله
دمت بعافيه

 

 

 

 

صالح العريف..

شاكره لك كل الشكر لروعة طرحك وجماااله
يعطيك ربي الف عاافيه
لك ودي واحترامي.