ديوان الشاعر /مليح الرويلي

قوانين كيرشوف

هاج القصيد وماج بين الحنايا=من شاعرٍ جوارحه كلها(وقوف)
للجادل اللي طشرتني شظايا=وقلبي لها من بين الاضلاع مزفوف
والله يهي سوت بهمي سوايا=باسبابها تلبسه جني الخوف
دخيل ربك ناظري للمرايا=والوجه باسم واسود الشعر ملفوف
حتى تعذرين النفس بالشفايا= لازاد تنهيده على لذة الشوف
يامربكة حسن القمر والصبايا=من قنبلة حسنك غدا القلب مرجوف
يكفي سكنتي في جفير الخلايا=وفي غمد دمي صرتي حسام ملقوف
إليا ندهتيني "مليح السجايا"=من شفتك نرجس حشا ماهي حروف
جيش الرموش أقفى بأثمن سبايا=سيف الفكر وازين مغاتير بالجوف
ومن لامني من قوم سود النوايا=في حب من فيها القمر دوم موصوف
يبلاه ربي بالتهاب السحايا=يموت مايلقى من الناس معروف
يكفي كسبتك وردتين وهدايا=ويكفيني إني كل ماعينك تشوف
سهله مثل رسم القمر والزوايا=ومعقده كنك قوانين كرشوف
مبطي وأنا نفسي تعاف الدنايا=ولا آصيد إلا اللي لها تصفق كفوف
في قوس حجانك خيوط المنايا=وعلى جبينك راية العز والنوف
ولامر طيفك لك خفوقي فدايا=قلبي معزب وابيض خدودك ضيوف
وماآبي أطلع مابقى من خفايا=بس أختصرها أني احساس مخطوف