من لايعرف الطير

من لايفكر فـي حقـوق المناعيـر**لايأمـن حقـوق الرجـال الكليفـه

المعترض من دون منطق وتبريـر**لايبلـش الحجـه وتأتـي ضعيفـه

من لايشّـوش لا لفـوه المسايير**يموت معـزول وحياتـه كسيفــه

من صد في الواجب على شأن توفير**ياعزتي له مـات ناقـص وجيفـه

رجلِ على ربعه تخمـه سعاطيـر**لاجات من برى عرف قدر سيفـه

المنفلـت لابـد مايعكـس السيـر**العقـل نعمـه ياالعقـول الخفيفـه

من لايعرف الطير لاينقـل الطيـر**يطلـق سراحـه للجبـال المنيفـه

من وكّل الراعي يعشـي المغاتيـر**لايرتجي البيعـه تعـدى النصيفـه

العز لـه هيبـه وحشمـه وتقديـر**متربـعِ وسـط القلـوب النظيفـه

الصمت له نظره وحكمـه وتعبيـر**كثـر الحكـي لازاد كـلِ يعيفـه

الصبـر نعمـه والليالـي مدابيـر**صكات بقعـا باالتجـارب عنيفـه

الحلم ضبط النفس يانفخـة الكيـر**يلجم مهـار الشـر تأتـي عسيفـه

صوت الحقيقه مايهـاب الطوابيـر**الظلم سـوء الضـن كمـه وكيفـه

العقل حـل المشكلـه دون تشهيـر**اللي عجن ستر البشر وش رغيفـه

الذل قصب العز وقعـه سواطيـر**لكـن مايقـدر للنفـوس العفيـفـه

البعد بعد القلب معنـى وتصويـر**كم واحـدِ مبعـد ولاغـاب طيفـه

مافيه كامل كلنـا تحـت تقصيـر**العاقل اللـي ينـزع ثيـاب زيفـه

أبيات أعجبتني
لما بها من حكم
يمكن يستفاد منها
لشاعر اسمه علي آل جميلة

 

 

 

 

متواضع..

شاكره لك كل الشكر لروعة طرحك
قصيده جزله ورااائعه
بيض الله وجهك على النقل الراائع
صح الساان الشاعر
وتسلم اناااملك اخوي
يعطيك ربي الف عافيه
لك ودي واحترامي..

 

 

 

 

الأخت سحر الغرام
تسلمين على المجاملة
والأروع مرورك الدائم
وتقبلي تحياتي

 

 

 

 

متواضع
سلمت يمينك على نقل هذه الأبيات
القليله بعددها والكبيره في معانيها
لك تحيتي وتقديري

 

 

 

 

الأخ بدر الشمال
شاكر ومقدر مرورك
والمشكلة أن البعض يفهمها
وكأنه الوحيد بالمنتدى وهو المقصود
وهي ليست مشكلتي
وتقبل تحياتي