دلو بوحي (سليمان المانع )

يا دلـو بوحي جـذبتك جيتني شلقا= تـارد تصـدّر ولكـن منت لاقيهـا
وقـفت هـنيّا ولا تحـوّل ولا تـرقا =أدني السواني حبال الرمـش تقصيهـا
نهـار الاحزان ليل أشرب ظما الفرقا= يوم المسـافات تطـويني وأنا أطويهـا
أقلب أوراق تاريـخ العطش وألـقا =أشـياء أبيهـا وبعض أشـياء مابيهـا
الله عـطاني جناحيني عشـان أشـقا= أقرا فضاها وأنا أجهـل سر أراضيهـا
شف وجنة الشوق من خنق الزمن زرقا= ناظـر عيـونه يتيمه كيف أبـكيهـا
كانت سـحابه ولاهي معـذرة أنـقى =أخـاف تزعل ومن يقدر يراضـيهـا
كانت خديجة تسافـر للسما طـرقا =تمـشي وحـدها ولا بنت تبـاريهـا
هــدية الله و ربي لابــغى ينقــا= يدني الهــدايا على مقـدار مهديهـا
مـرّت أغـاني وضـجّ الجمع يا عنقا=لا واهــنيّه حبيبك قلت أسمّـيهـا
ومـن بـاق عهدك يا علّه يوم ما يبقى= ياركعتينٍ ســهيت وجيت أصلّيهـا
لعيونك أدمـي وإذا دلـوي رجع شلقا= أبجدل حــبال خـادمـها وواليهـا