آخر دروسك يا قلبي إنتهى .. ومازلت فاشل

انتهى الدرس الأخير .. وتبقى ياتلميذ .. فاشل
ساقط بكل المراحل في حياتي العاطفية

هذا حظك .. وش تسوي؟ .. وليه يا قلبي تحاول؟
إرضخ لظلم الحقيقه .. وارضا بحظوظي الردية

مافي دنيا الحب رحمه .. لا ولا تشفع مراجل
كل من فيها متشابه .. حاله من حال البقيه

مايفيدك غير حظك .. وانت حظك .. دوم مايل
والله ماتلقى نصيبك .. دام عنك الحظ عيا

المحبه .. خلها لاهل المحبه .. ولا تجادل
ما لمثلك غير همه .. ودور حمال الأسية

ذكرياتي .. والشقا .. وعقلي .. ومجموعة مشاكل
كلهم ضدك .. وانا باخذ براي الأغلبيه

قلبي .. إعذرني .. ترى ماعاد لي قدرة أجامل
طول عمري أسمعك .. والحين .. إسمعني شويه

من عرفتك .. وانت تحلم حلم .. مايطري لعاقل
حلم اتعبني وانا أركض وراه بحسن نية

عاشقين .. وقلب واحد .. وسط تغريد البلابل
لا مشاكل .. لا هموم .. ولا سهر ليل وأذية

التفاهم .. والثقه .. والحب .. واسلوب التعامل
شكلوا برواز حلمك .. في زمان الشاعرية

إصحى يا نايم .. وقلي: وين تلقى انسان كامل ..
..في زمن ناقص .. همومه في كرمها حاتمية

راح وقت الحب .. والشباك .. واشواق الرسايل
ياهني العاشق اول .. إيه والله ياهنيه

مايشابه حلمك الا حلم بعيون .. الأرامل
مستحيل انه يتحقق فالحياة الواقعيه

إصحى وارحمني ترى مليت .. وما أقدر أواصل
إصحى طالع فاللي حولك .. شوف كم راحوا ضحية

وش تبي فالحب؟؟ خله .. عيش .. وتلقالك بدايل
ماكفاك اللي جرى لك؟ واللي لين اليوم فيه؟؟

آخر دروسك يا قلبي إنتهى .. ومازلت فاشل
ساقط بكل المعاني .. في حياتي العاطفية