خلف المشعان يرثي أخيه موسى !

رحمة الله على اقلط / مرحبا / ماتجون ؟=بعد ماقيل موسى رحمة الله عليه ...!
عاش طيلة حياته يهتف بـ وشتبون=لين قالو توفى واهتفولي نبيه ...!
كل صدمة مصيبه في حياتي تهون=لكن فراق موسى ماقدرت احتويه..!
قبل اقوّي عزومي واحتزم بالظنون=شالت الريح سفني عكس ماتشتهيه ..!
في دقيقة وفاته / طاح دمع المزون= كن حايل تنادي لارضها .. ودعـيه ..!
ويل حالي على اللي لادرو يفزعون=كيف اسد بمكانٍ كنت مسنود فيه ..!
من دموع اليتاما وسط صدري طعون= ومن وراهم يتامى طيب مدة يديه ..!
كل عين ٍ شكت لي فقد هاك العيون=كنها من عيوني .. غمّضت تحتريه ..!
وش بقول لصغارٍ بالعزا يلعبون=مادرو عن مصابي في فراق النزيه ...!
بين حمل الفراق وحملهم بالمتون=كل هم بخفوقي ... غاب عوّد اليه ..!
يستر الحزن صدري والمحاجر تخون=اسود الفقد بانت لوعته بالوجيه ...!
يوم شفت التراب يهال صحت امغبون=ليت عمرك يـ خيّي ينشرى واشتريه ..!
لو تجيز المنايا للبشر يفتدون=والله اني بروحي ... لارتجل وافتديه ...!
مار ماهي بيدّي والمقدر يكون= ويل حالي عليّ .. ورحمة الله عليه ...!

:
:
:
.

نسأل الله أن يرحم الشاعر موسى المشعان وأن يسكنه فسيح جناته

وعظم الله اجر اخونا العزيز خلف المشعان وكافة أسرة الفقيد