اسعد الروابة (عادتي)

عادتي ليّن معه واحيان قاسي
ارخي الحبل بهواه وثم اشده


قال تنساني وقلت الحين ناسي
... اختبرته بالمزاح وجاب جده


طاح ماكنّه على القاع مْتواسي
قال من عذب الكلام وقال ضده


لين ضجت طاولتنا والكراسي
بحت سدي وانتفضت وباح سده


وصحت به يكفي ترى (صدّعت راسي)
وموعدٍ ياثقل دمه قلت عدّا


وافتقدته وافتقدت احلى الأماسي
وفرْحي اللي منْه انا كنت استمده


وانتظرته لين ماوصّلت ياسي
ووصّل الصبر بْمعاناتي لحده


واتصلت وردلي ردٍ سياسي
قال صوتك ماسمعته صار مده


ليته اللي قال اباذوّقْك كاسي
ليته معّصب علي والا تحدى

قلت راحت نبرة الصوت الحماسي
وبكْيَك اللي من علامات الموده


قال لي ياخوي غالبني نعاسي !
وكنه اللي وقّف انفاسي بيده


كان ينبيني مثل عقلي حْساسي
صدته هذي مهي بّايات صده


قلت رد لصاحِبَك يا اعز ناسي
قال لو رديت ..قلبي وش يرده!

اسعد الروابة