ياالله دخيلك ،، من ردى الحظ ، والميل
وياالله دخيلك ،، من صدوف الليالي
والضيقه أللي تعتريني ، مع الليل ؟
الله يهونها ،، ويرتاح بــــــــالي
يارب أنا عبدك ،، ولا عاد بي حيل
والهم صار اليوم ، فوق أحتمالي
عجزت أشيل هموم ،، وأتعب وأنا أشيل
وأحاول أسلى ، مير مانيب سالي
كل يوم يمر أقول ،، بكره تساهيل
بكره يجي ،، والحال هي نفس حالي
مرت علي أيام ،، شفت التهاويل
فتره كئيبه ،، والسبب ،، ماجرالي
السالفه ، ماتحتمل أي تحليل
لاهو بقل أموال ،، وياكثر مالي
أنا أنصدمت بوقت ،، وراني الويل
الوقت طيحني ،، وأنا كنت عالي
من كان يشعل فالرخا ، لي قناديل ؟؟
في شدتي ، ماشفت واحد صفالي
الهم كبلني ، مع الوقت تكبيل
أللين صار الهم ، عمي وخالي
مدام هالدنيا ،، تسـّــر المهابيل ؟
أبترك المنطق ،، وابعلن هبالي
علّ المسره ، فالليال المقابيل
وعلّ السعاده ، دايم تكون فالي
بعض البشر مـُـعطى ،، ودربه تساهيل
وبعض البشر محروم ،، ماله مجالي
يقطعك ياوقت العنا ، والغرابيل
غدرتي من ضاقت ، عليه الليالي
والضيقه أللي ،، تعتريني مع الليل ؟؟
راحت بعد ذكر الله ،، وأرتاح بـــالي