ياعــل عينٍ مابكت فــرقا الأضعان**تـعطـى النـويـفـج لين تـذبل ذبليــا
لياشدّوا العربان مــن عقــب مقطان**والصبــح منهم جانـب العــد خليـا
وتفـرّقـوا مــن نــقــرة العــد سلفــان**أحـدٍ رحـل جنـوب وأحــدٍ شمليــا
وقفـّوا وراحوا مع وسيعات الأوطان**وكلٍ على سفن الصحاري رحليـا
عـلـيهـم الخــافـق تـقـل فـيـه نــيـران**وتصلاه غمزات الهواجيس صليا
وبكـت عيوني مـثـل همّــال الأمـزان**مــزنٍ تحــدّر مــن مناشيه مليـــا
علـى الذي لـه داخــل القلـب مسكــان**وعليه ماأسمـع عـاذلي لـو عذليا
عيـن الفـريــد اللـي مـرابــيـه فيحــان**الريــح لاعــه و إستـذار وجفلـيا
وسمع الحساس وشـاف بالعين زيلان**وإستأكده بيــن الــوعر والسهليـا
الصاحب اللي يمــّه القــلب شفقـــــان**ولا ينجلي حبــه عن القلب جليـا
اقــفــوا البـــدوان والقلـــب حيـــران**وســـود الليــالي ماعطتني مهليـا
شــدّوا وأنا من شــدّة البدو زعــلان**ولامن وســاطة بين أهلها وأهليـا
وجيته وانا في وقتها كنت مرضــان**مـن شـــدّة العـربان فيّــه زعليــا
قلــت السلام وغــادي الفــكر شتـان**واللي بغيت بخــاطري ماحصليا
وانـــا عليــه بسلم الأحبـاب شفقــان**ومـن غير مشروهي فلالي دخليا
طافت مشاريهي وأنـا كنت شرهان**سنـــّه صغير وغاطسٍ بالجهليـــا
وقلــت الوداع وغادي وجهه ألوان**متخالـــطٍ فيه الخجــل والزعلـــيا
وذقت الفراق اللي مشاريبه أحزان**وأنحـل بحالــي والمحاني هزليـــا
كنـّـي كسيرٍ شــم لـه ريــح ريحان**نوبٍ يـفـيـق ونـوب يذهــل ذهليــا
عليك يالمجـمـول ياخـدر الأعيــان**سمــّيت حالي لـيـن جسمـي نحليـا
والحب مثل النـوم والنـوم سلطــان**والله بــلانـي فـي مـحـبـتـك بـلـيــا
وجاني الربيع وربعت كل الأوطان**وأنـــا معاليج الضمايـــر محلـيــا
وطال الرجا واللي مضا تقل ماكان**واللي بنــينــا لـغـــدنــا مـاكمـليــا
لاشك خبـّرني عسى ماأنت خسران**أو شايف اللــي بالطويـلـة تعليـــا
وإن كـان حــدّوك المقـرّد وعــدوان**ماني لاأبــا زيــدٍ ولاإنتي بعليــا
هذه القصيدة للشاعر الرائع جزا صالح الحربي أعجبتني
وإنشاء الله تعجبكم