جيت المدينه داخلي .. طفلٍ عسى الله يصلحه
طفل بدوي ولد بدوي .. طيب ولكنه عنيد
جيت المدينه وفي يدي .. طيب البداوه ومسبحه
جيت اشوفك يا الحضاره .. جيت ادور للجديد
طفل يعيش بداخلي .. وكل كلمه تجرحه
يهدي سبايك من ذهب .. والناس تهدي له حديد
كل دمعه تجرحه .. وكل بسمه تفرحه
جيت ادور للفرح .. وما شعرت اني سعيد
لو تون وتشتكي .. الدمع محدن يمسحه
الناس واجد بالمدينه .. واقرب العالم بعيد
ما في المدينه اي شي .. قلت يمكن امدحه
واعجزت يا دروب المدينه .. واحتار واياي القصيد
الوضع يا قلبي صعيب .. والحال مقدر اشرحه
اريد وانت ما تريد .. والله يفعل ما يريد
محدٍ ضحكلي في المدينه .. الا ويبغا مصلحه
فقيرها ماله سند .. وصار الردي عم وسيد
رجعتي لك يا المدينه .. موضوع توبه وافتحه
خلاص يا قلبي خلاص .. لا تزيد ولا تعيد
سلام لك يا قريتي .. يا طيف دايم اللمحه
يا قريه يا قصى الجنوب .. احرار ما فيها عبيد
جيت المدينه داخلي .. طفلٍ عسى الله يصلحه
طفل بدوي ولد بدوي .. طيب ولكنه عنيد
للشاعر مساعد الشمراني