يازين قلبي فيك مغرم و مفتون=وحبك طبع في القلب بآلة طباعه
ماعاد يمحى لو غسلته بصابون=وعزّي لقلبٍ لايع الود لاعه
وين انت يامبيّح خفا كل مكنون=مشتاق لك شوق الفطيم لرضاعه
مستدخلٍ حبّك مبا الناس يدرون=وبريت حالي بري عود الجراعه
من عقبكم والحال من دون في دون=فضحتني يالترف عند الجماعه
خليتني مثل المجانين مجنون=وورّخت لك في داخل القلب راعه
حسبي عليك الله ياباهي اللون=ليه الجفا والصد ليه القطاعه
يابو نهودٍ كنّها طلع ليمون=اخذت قلبي من مكانه قلاعه
والقلب عندك يا اريش العين مرهون=ومن طاح بين ايديك ماله شفاعه
ياعين حرٍ عند هزّاع ابن عون=متفهّق الجنحان هجرٍ كراعه
لاسلهمت برموشها الموت مقرون=من شاف هاك العين يعلن ضياعه
والقرن ذيل اللي تشعشع ضحى الكون=يوم ان كلٍّ نجدته من ذراعه
يوم ان هاك الوقت طاعن ومطعون=وعدايل الطمّاع تصبح طماعه
والعنق عنق الظبي والعرض مصيون=بنت الرجال اهل الكرم والشجاعه
حريبهم مايرقد الليل مغبون=ياما سقوا عدوانهم سمّ ساعه
والخصر خمس اقفال والا بعد دون=والخد مثل الشمس يوضي شعاعه
وش عاد خلاّ للغنادير .. مالون=اخذ جميع الزين مدّه و صاعه
امكمّله وامجمّله خالق الكون=ومن الحيا والدين ضافٍ قناعه
واليوم ما اسمع فيه مهما يقولون=وهرجٍ من العذّال ما اقبل سماعه
باب الرجاء مفتوح وابليس ملعون=وماقدّره مولاي سمعٍ وطاعه
الشاعر :مرزوق ابن جريس