..
أحبك أحبك أحبك ماهي مجرد أي كلمــه.!
لكل من جاء بدون شعور أنا أحكيها
بلا إحســاس..
ولا معنــى..
ولاذمه.!
تموت الكلمه في صدري بما فيها..
ولأني أقولها لإنسان وهي في الأصل ماتهمه..
كبيره حيل هالكلمه وغلات أمك فهمتيها.!؟
تبيني لك أنا أشرحها كانك جد مهتمه..
[بسيطه!!]
خذي لك طفله صغيرة وعلى إيدك ربيها..
وعطيها من حنان القلب حنان يغطي هالأمه..
وبعد ماتكبر بحضنك لأهلها روحي وديها.!
وشوفي حالتك وشلون بعدها كيف منغمه.!؟
إلي منك شعرتي صدق خلاص إنك فقدتيها..
وهي لك كانت الدنيا ونبض القلب مع دمه.!
وفجأه إختفت عنك وقالوا اليوم إنسيها..
وإنسي يوم قالت لك أحبك حيل يايمه.!
[أمانه!!]
بس أبي أعرف يجيلك قلب تنسيها.!؟
تعديها مجرد حلم بس الوقت ماتمه.؟
وش يعني الحنان اللي من قلبك عطيتيها.!؟
طبيعي هالعطاء مهما نقص أو زاد في حجمه..
غريزه نابعه من القلب ولا تدرين وش فيها.!؟
وكانت قبل لاتنطق حكيها وقبل لاتمه..
تعرفين اللي بتقوله قبل ما أنتي تسأليها.!
غلاها وش هو يعنيلك.!؟
غلا خاله.!؟
غلا عمه.!؟
أو هي مجرد طفله مسكينه وبعطفك حضنتيها.!؟
وعادي لوخسرتيها.!؟
يمكن منتي مهتمه..
~^~أبي تعيشين هالقصه من أولها لتاليها~^~
وأبي تعرفين وش المقصود منها ووش الحكمه.!؟
ساعتها..
بس بتعرفين (أحبك) ليه أداريها.!؟
وليه بالذات هالكلمه ماهي بس أي كلمه.!
وإذا كانت مشاعر صادقه والحب يحييها..
وترى ماهي غموض احساس وكلن انسان على فهمه.!
كثير أشياء تثبتها وكثير أشياء تنفيها..
وإذا مات الصدق فينا..
نموت ونندفن يمه.!
ولا إنا نعيش بكذبه أنا وإنتي مانبقيها..
ترى درب الهوى متعب كما اللي يصعد القمه.!
يبيله قلب مايتعب وخطواته يهديها..
لجل يقدر على المشوار وما يضعف أبد عزمه.!
شفتي شلون هالكلمه كبيره حيل بمعانيها..
ولا أذكر قلتها لإنسان إلا ضلوعي تضمه.!
عرفتي إنتي لي وش تعنين.!؟
هذيك الطفله..
عرفتيها.!؟..