♧ عزة النفس ♧
لا تشتكي حالك على ساير الناس
بعض الاوادم للشماته طروبه
الناس ما كلن يحطك على الرأس
كلمتك لو زلت عليك محسوبه
بعض البشر ينبش عن العرق والساس
يصير لك في كل يومن عقوبه
ما كل واحد لا ابتسم على قياس
بعض البشر ضحكه يغطي عيوبه
الخلق عاملها بتقدير وإحساس
الكل منهم لا تنقص وجوبه
وابعد عن الرديان وأتباع الانجاس
يضحك معك ولا النوايا كذوبه
النذل ودك تطحنه بين الاضراس
ودك لهيب النار يكوي جنوبه
الكلمه الزينه ذهب حر والماس
مثل العسل لا خالط الريق ذوبه
والكلمه الشينه غثى دوم تنداس
على اللسان الشين دايم لعوبه
ثوب المراجل ما البسه كل لباس
النشمي اللي ما يضيع دروبه
خذ من صفا دنياك لكن بقياس
عجاج نفسك لا تطاوع هبوبه
الناس مخلوقه من الخالق أجناس
تبقى السراير خافيه في غيوبه
الفكر ماهو حبر من فوق قرطاس
الشين هايف والركاده عذوبه
اسج وأفكاري مثل قرع الاجراس
والصدر بوحه ماقصر في شبوبه
شعر فهد رمضان المطاردابو وليد