يهز غصن الرجـا نسنـاس
واجمع لك الدمع مـن خـدّه
مرات أحس بتعب و اعماس
يعـاود البـال مـن مــدّه
لا باس يا خاطري لا بـاس
السيف مـا يجرحـه حـدّه
والقلب لولا عليـه أقـواس
لا فـز بعروقـه اتـصـدّه
يمديـه لا هـزه الهوجـاس
يشقـق الـصـدر ويـقـدّه
لي صاحبٍ ناعـمٍ حسـاس
أغلـيـه بالـحـيـل واودّه
في عيونه ..عيونه النّـعاس
يبنـي لـي الشـوق و يـهـدّه
والظبي والليـل والقرنّـاس
ومـا لا اقـدر احصيـه وأعـدّه
يقول لي في حشاه إحسـاس
مانيـب كـبـره ولا قــدّه
ويقول أحبك وأحـس بيـاس
والأمر ماهـوب فـي يـدّه
قلت آه يا المطـرق الميّـاس
من طـاري البعـد والصـدّه
ياليت يجمع قلـوب النـاس
أشبـاه والضـد مـع ضـدّه
وأحبك بهـا بـدون اقيـاس
ليـن العمـر ينتهـي حـدّه
يازين مافي البعـاد أونـاس
إن كـان لـك كـفٍ تمـدّه
عطني لعيني بعـدك انعـاس
لا تـــاخـذ الـنـوم وتـلـدّه
وأنا أوعدك وأوعد القرطاس
بالحب فـي الليـن والشـدّه