(((ياللي تحطون المسامة على الفيل)))
قالو تحب وقلت بالحيل بالحــــيل = هو فيه قلب ن من عنا الحب خالي
لكن اشوف الحب من بعد ذا الجيل = ينعاف واكثرهم يعشــق الخيــــالي
اما على الكـــرسي يجـــر المــواويل = يزاعـــق بصــــوت ن يهد الجبالي
والا علــى الهاتـــف يدز المراســيل = ويقول انا هايـــم بحـــب الغــزالي
اللي بــــرت حالي وذقت الغرابيل = وخلتني من الناس عايـــش الحـالي
هو مابعــد شاف لحبيــبه مداهـيل = صوت ن على الجوال سبب هبالــي
ياناس هـــذا العشق مــاله تفاصيل = الا سراب ن عقب وقـــت الـــزوالي
اسمـــع كلام ن غير هرج المهابيل = ابعترف بالحب واســــرق حـــلالي
مانيب من يرمي بيوت الرجاجــيل = وبيته قزاز ن عرضــــه للهيـــــالي
نظرات عيـــــنه للهوى فيه تعديل = الناس شرق ن والضعـــــيف شمالي
راح الهــوى العذري وجابله تبديل = ضعيف نفس ويحسبـــنه مثـــــالي
لا لا بعـــد ويقول ويـــن المناديــل = دمعي من الفرقا على الخــــد سالي
العشـــق له مفهوم غير الذي قيــل = عشق الشرف عشق النقا والدلالـــي
واضــرب مثل لوكان ماهوب تنزيل = مجنون ليلى عذبتـــه الليـــالــــي
ومحيســـن وقــبله رجال حلاحيل = عنتر وبن عدوان وايـــضا الهــلالي
ذولا رمـــوز في الهوا جالهـــم كيل = على النقا كل فتـــح لـــه مجالــي
واليوم كل حــط في ساحته خيل = ويقول ابويه ناشــــدن مـــن خوالي
انسان لكنه علـــى شكل برميــــل = ( يشرخ ويمرخ في ذرا كــــل عالي )
ياللـــي تحطون المسامه على الفيل = ماهيب له لو جودت بالحبــــــالي