بسم الله الرحمن الرحيم
ياللي طلبتـم نبـذة مـن قصيـدي *** عن واقع المعقول لا أنقص ولا ازيد
انـا غرامـي وانبساطـي وعيـدي *** تفريعة القرناس بأرض بهـا صيـد
لا شطب الصيحان روس الزبيـدي *** والعشـب جالـه بالمثانـي عناقيـد
والبـدو مايبـدي لهـم بالشديـدي *** تسعيـن ليلـة ماحكـوا بالمواريـد
ضيق بهـم در الغنـم والجميـدي *** مايشربـون إلا حليـب المجـاديـد
والبل وبرها طار وأبـدل جديـدي *** وردوم على الفطر سوات المجاليد
من فضل ربي كـل يـوم تزيـدي *** قامـت عشايرهـا تسـن المفاريـد
والفجر تسمـع للطيـور اتغريـدي *** ليل الشتاء طوله عليهـن سراميـد
هذيـك والله منوتـي ياعضـيـدي *** لا جابها الله من صـدوق المواعيـد
ماكفـه الديـر لرجـم المفـيـدي *** وذوب على خشم الخدار ومشاحيـد
مجهود من نـو الجبـاه السديـدي *** وحصل لها قبل العقـارب تماديـد
غثوه على روس الشجر والهضيدي *** وساق وتساقـي للنفـود وتخاديـد
وفيض على فيحان ريـف البعيـدي *** نبي لنـا بشعـاف لوقـه مطاريـد
علـى اوسـوق مقربـات البعيـدي *** من فوقهن يازيـن مـزح الأواليـد
لا فـرع النـادر وطلعـه وكيـدي *** وحول على جول الحبارى تقل حيد
وسلط على الخرب النشيط العنيـدي *** حاسه وداسـه والحبـاري ملابيـد
يقضي بها الصقـار يـوم جديـدي *** في ساعـة مابـه وجيـه مقاريـد
هذا هـوى بالـي وهـذا رصيـدي *** سوق النظر بين السهال الجراهيـد
لوكان من طـرد الولـع ماستفيـدي *** فتق بقلبي واعـذروا يـا الأجاويـد
نومي تحت طل النجـوم الجليـدي *** عـندي كنـب ومنجـد زل تنجـيـد
لو لامني خطـوا الغشيـم البليـدي *** طرد الولـع مابـه عليـه مناقيـد
وشوف الفياض المخضره يالحميـدي *** وشمة ذعاذيع الهـوى عندنـا عيـد
وللكيف ذوق ولاستمـاع النشيـدي *** لا قلطـوا رسـلان والا بغـاديـد
ثنتيـن هيـل وثالثتهـن عـويـدي *** وكل(ن) على ماتطلب النفـس وتريـد
وقدوعهن من طلع هدب الجريـدي *** احسن نمونه من نما شـرع الغيـد
وسوالـف ماقيـل فيهـا جحيـدي *** بالصيد لا نمـة ولا هـي هرابيـد
ساعـات نقضيهـا ويـوم سعيـدي *** ولادامت الدنيا لعامـر وابـا زيـد
الـدايـم الله والفـنـا للعـبـيـدي *** والرزق عند منـزل الـدر بالديـد
محي الهشيم اللي عروقـه هميـدي *** رزاق ماتحت الصخـور الجلاميـد
والله يدبـرنـا عـلـى مايـريـدي *** وصلوا على اللي وحد الدين توحيد
الشاعر بدر عواد الحويفي الحربي ,
رحمه الله
