(شبكة ومنتديات الشميلات الرسمية) - القصيدة الشيخه لمشعان ابن هذال

القصيدة الشيخه لمشعان ابن هذال
يالله يامديـر الهبـايـب والأدوار=شانك عسى تصريف شانك لنا خير
يالله ياعالـم خفـيـات الأسرار=يامعتني بالخلق والـي المقاديـر
هلّت دموع العين من شوفـت الـدار=سكانها الأجنـاب هـم والبقاقيـر
من عقب ماحنا بها مثـل الأسوار=نأمر وننهى ونحمي الجار ونجيـر
حامينها في لابـةٍ تسقـي الإمرار=عدوهـم مايحتسـب بالمخاسـيـر
ومن عقب ماكنا بنجدٍ كمـا النـار=نقطع بها شرٍ وناصـل بهـا خيـر
وحنا الذي ترجع لنا كـل الاشـوار=لاصار بالقـولات شـوّار وامشيـر
لابــد مانـاتـي لأبـانــات زوّار=بأسلاف عجلاتٍ تعـدّا المضاهيـر
يهومن هومـاتٍ بعيـداتٍ وعسـار=وكم ذيّرن من واحـدٍ مابعـد ذيـر
وتواهلن الزور حصلن لهـن كـار=من البطينـي للرهـا لـه معابيـر
نامر وننهـى مانـدور بهـا ادوار=ونهدي العاصـي بيسـرٍ وتيسيـر
وكت مع الحاوي وداجن بالامصار=وجابـن خفارتهـن بفكـرٍ وتدبيـر
وحطن على السلمان طيحات الامطار=وصارت لهن لينه وخضـرا مصاديـر
ومالن على رجم الهيـازع وسنّـار=وجابن حلال محمره من ورى النير
وقضّن وكالن من شثاثـا بالاسعـار=وحطن لملـوم المسمـى مصاديـر
وحطن على ورد الدجاني لهب نـار=وغدو بها الويلان مثـل المداويـر
و(أباذراع) أضحى مقيمٍ على الـدار=وقطعن حـلال محمـره المساميـر
وشدّن وحطّن الثمامـي بالايسـار=وخلن على (المطران) مثل المعاصير
وسارن بنا الزرفات بإقبال وإدبـار=من غوطة الفيحا إلى غشلة الديـر
نروم من زيـن المنـازل ونختـار=ونسترد الخـوّه بحـدب البواتيـر
ليامن نخونا اللي على نجد حضّـار=وجانا كتابٍ من زبـون المقاصيـر
من (ماجد بن عريعر) حر الاوكـار=يقـول وُخـذت داركـم يالمناعيـر
الشيخ اللي حيف على البيض بالغار=يقول حل بداركم (حرب) و (مطير)
وجيناه مثل السيل طمّـام الاوعـار=لياما غدت عنه البـوادي شعاثيـر
أولاد عـم ولا بنـا قـول شبشـار=وشيخٍ لنـا عنـده جـلالٍ وتقديـر
ورفاقةٍ واللـي حذاهـم لنـا جـار=وحنا عليهم نحمي الجـار ونجيـر
وحنا شبابت الحرب وان شبّت النار=وتوايقـت بيـن الحنايـا الغناديـر
وحنّا هل الجمع المسمـى إلياسـار=مركاضنا يشبع به الذيـب والطيـر
وحنّا بني وايـل بعيديـن الأخبار=إليا تناخـوا بالجمـوع المشاهيـر
وين أنت ياللي تايهٍ منك الأبصار=جيناك حوله من شثاثـا وابالجيـر
وصحنا عليهم صيحةٍ تجلي الامرار=حتى جبرناهم عـن الـدار تجبيـر
هج (الدويـش) ومالقينـاه بالـدار=زبن على الحرّه وذيـك الشناخيـر
كسيـرةٍ ماقـط ذكـرت بـالاذكـار=بها القلايـع مثـل روس الخنازيـر
لولا شفاتي فيـك يانجـد مااحتـار=فكـري ولاكثـرت علـي التفاكيـر
نجـدٍ جفتنـا وكـل دارٍ لـنـا دار=ماهي معافه ميـر جـوع ومداهيـر
نعتاض عن دارٍ عليها الدهـر جـار=ديد العسل فيهـا تعيـش المفاقيـر
دارٍ بها بالقيـض غـدران وانهـار=والتمّن المجروش ملـي الجواخيـر
وصلاة ربي عد مـا بالسمـا طـار=وعداد ماوردن ضمايا علـى البيـر
على الرسول المصطفى سيد الابرا ر=نور العباد اللي دعا النـاس للخيـر