باح الخفا وأبديت مكنون الأشجان = من هاجسٍ ماهاد والناس ممسين
لاعاد ليلٍ لايله هم وأحزان=ليل الخميس بلا توجس وتخمين
شاع الخبر مثبوت صدقٍ ووكدان=ماهو كلام مدبلجات العناوين
مرحوم يا مدعى الوفا يا إبن مشعان=يا كاسب النوماس والناس دارين
بالطيب والشعر الحقيقي واالإيمان= نلت النفالة بين كل الكريمين
محدٍ يرد الموت كان الأجل حان=في يومه المحتوم لو تدمع العين
لو الرثا يرجِع ربوعٍ وخلان= ما كان تلقا بالبرية حزينين
الله يبيحك عَلْ مثواك رضوان= بــ اجنان عدنٍ منزلك وسط عَلين
يـ اللي ليا من حل تمجيدك وبان = تكسب ثنا التمجيد عند الحكيمين
نعمٍ يأابو محمد له النعم نيشان=ليا قيل موسى قيل والله ونعمين
من لابةٍ تشهد لهم كل الازمان=بالطيب والنخوة ومجد المسمينً
نالو ثناهم بالفعايل والاحسان =عز الصديق وعلةٍ للضديدين
عقا قرة من دور صولات الاكوان = يٌعرف فخرهم في جميع الميادين
مقدامهم ليث الوغا ذرب الأيمان= سلايل حريميس نسل الميامين
ليا ثارت الهيجا وراغن الأذهان = خاضوا معامعها وعادو فخورين
فدعان من وايل ليا قلت فدعان = با لجود واللقوات ماهم خفيين
شيخان وأجواد ومقادم وفرسان = يشهد لهم تاريخ عصر القديمين
بواجة البلدان سادو بـ بلدان= محدٍ قربها غير حمع الجسورين
تصويتة أبن مهيد زعيم الأعيان = وعطية أبن غبين بالعسر واللين
وسلايل قعيشيش في كل ميدان= وفعل الأميَر والرعوجي بتبيين
ومحسن رخيص الروح لاطم سوادان = وفعل الحميدي بالفخر له براهين
وأبن عربان بكل طيبٍ وبرهان = وأهل النفايل راجحين الموازين
أمثال شهمٍ صار بـ العوز مزبان = يوم زبنو ربعه ربوعٍ معوزين
الكٌره والروس الكريمين عٌوان = للشمري واللي على الروس عانين
وأمثال بقرص يوم كسب الفخر زان = نال المفاخر رغم أنٌوف الحسودين
وفعل اخو مزنة لــ انتخو بـ أبو زيدان= لو مهو جدًي قلت قول الكثيرين
ومفاخر الفدعان من دون بهتان= أمجاد ما تحصى لجمع الفداعين
أولاد وايل كل ما قيل ويلان = نعم الأسود الكاسرة والسلاطين
رجالنا صبره تعدا بليهان = بأقسى المصايب فاق صبر الصبورين
وبالجود مده بالعطا دون حسبان= وليا انتخوبه يردع الصاع صاعين
إن قلت له بركان با لفعل بركان = تخمد امامه ثايرات البراكين
أقولها واذكرك من دون نسيان = ليا جا مجال الغانمين الوفيين
ياما تسامرنا بعذبات الألحان = وياما صغو لــ أقوالنا من فهيمين
يا قدرة الله كنها لحظة الأن = ما كنها ياابو محمد من سنين
ليا قلت ياابو عبيد وين أبن رمثان = قل لــ أبو فارس يتجه حزة الحين
أجيلكم عاجل وواله وشفقان= رغم التعب لو يصبح الليل لليلين
كم جلسةٍ تصورَت سر وإعلان = بطرايفٍ تطرِب سماع الشريفين
ظلت تعاليلٍ تشَغل بشرطان = لذات وقتٍ راح تسوى ملايين
يوم اللئام بسيرة فلان وفلان= بالذم والغيبة ومدح الرديين
كوبان يرهف له من الناس كوبان= اللي على هرج النمايم حريصين
حنا نحط لصفحة الطيب عنوان = ونساند الأخيار رغم اللئيمين
عساك للجنه بعفوٍ وغفران=أمين يا قابل دعاء الملبين
وختام قولي للوفي طير حوران = المؤمن اللي تابعٍ سنة الدين
عيسى عوضنا وإحمد الله له اخوان= نالو فخرهم عند الأدنى والاقصين
عضيده إبراهيم بالطيب ما هان = وخلف تقدمله دروع ونياشين
وإبن الفقيد الله يمده بسلوان = وصبر الرجال الصابرين المٌثُابين
محمد عسى عمره عن الشر منصان = وأخوانه الوافين دايم عزيزين
من كان مثله قيل طلعة كحيلان = ما حاد عن منهاج سلم الحشيمين
وصلو عدد ما هل همال الامزان = على رسول الله ختم النبيين

الشاعر الكبير ولاعلامي الفذ ابو فارس

اسمح لي ان اعزيك بالمرحوم موسى المشعان لأنك اخ لكل وائلي
صح الله لسانك على قصيدة الرثاء التي وجدنا حروفها ممزوجه بألم وحسرة
لفقدك اخيك وصديقك وصديق الجميع موسى المشعان الذي بكاه كل من يعرفه
لان فقده يعتبر صدمه لكل من يعرفه نحن مؤمنون بقضاء الله وقدره ولكن الفراق الابدي سكين يغرز بالقلب ليضل ينزف
ابن زيدان لقد تميزت بخصال لا يتميز بها سواك اطلب من المولى جل شأنه
ان يديم عليك الصحه والعافيه وان يحفظك من كل مكروه وسوء

دمت بعافيه

صح لسان ابو فارس

والله يرحم ابو محمد ويغفرله