انقلع طير
 

انقلع
البارحه دقت طبول ومزامير !
__________ اصوات في راسي بقت مستمره !

اشوف بعيوني جنون الأعاصير !
__________ الأرض راجت والقدم مستقره !

ثارت تدز جبالها للمحادير !
__________ يطحنبها روس الخشوم وتذره !

هوجٍ تجول من الغضب قامت تدير !
__________ دارت رحاها تصطفق مشمخره !

ماعاد اميز بين شرٍ ولاخير !
__________ كانك تميز بين خيره وشره !

احيان تلقاني على راسي الطير !
__________ واحيان ماتلقى من العقل ذره !

واحيان تفرحني وجيه المناعير !
__________ واحيان ما تلمح بوجهي مسره !

واحيان مع مقدم هل الشور واشير !
__________ واعطيك علمٍ لـ الزمن وانت صره !

جساس خان كليب واستهون الزير !
__________ والزير تدري ما رضا بـ راس مره !

حنا ليامن قلت حنا المشاهير !
__________ يذري ذرانا بـ الزمن كل حره !

نفوسنا ماهي رديه / معاثير !
__________ وخشومنا عن الثرى بــ المجره !

حرار ماتشكل علينا العصافير !
__________ وش عاد لو تمشي على الأرض ذره !

انت تعرفنا بـ الليالي المدابير !
__________ عدونا مايهتني في مقــره !

عاداتنا نرميه وسط الطوابير !
__________ وارماحنا صدر العدو ماتغره !

اقول لايكثر ترى سكوتك أخير !
__________ سوالفك حتى الغبي ماتسره !

لا منصفٍ نفسك ولا منصف الغير !
__________ ولافيك خير ولاتجيب المضره !

مثل العمى تركض على الدبك وتسير !
__________ ليتك تميز بين جره / وجره !

ياشيخ طير هناك / بس انقلع طير !
__________ افعالنا صعبه عليكم ومره !

ان عودت شعر ومعاني وتصوير !
__________ يكفيك لاجيت البحر / جبت دره !

قسمي تعرفه يوم خز المعاشير !
__________ حارم على غيرك وصعبٍ تمره !

شواردي ماهي لقايط شواعير !
__________ يمدحبها خطو الغشيم وتسره !

شاعر ويكفي ماتميلحت لـ امير !
__________ ولا شلت بشت ولا رجيت المبره !

انشهد اني لامدحتك تبي تطير !
__________ واليا هجيتك تكره الشعر / مره

راكان المرشد الفدعاني

رد: انقلع طير