ياما حلا ياعبيد في وقت الاسفار

ياما حلا ياعبيد في وقت الاسفار =
جذب الفراش وشبّ ضوّ المنارة

مع دلة(ن) تجذا على واهج النار =
ونجر إلى حرّك تزايد عباره

في ربعة(ن) ماهيب تحجب عن الجار =
لا منّ خطو اللاش ما شبّ ناره

النجر دقّ وجاوبه كل مرّار =
مالفّه الملفوف من دون جاره

وأخير منها ركعتين(ن) بالاسحار =
لاطاب نوم اللي حياته خساره

تلقاه في يوم(ن) يضيعن(ن) الافكار =
يوم(ن) على المخلوق ما اطول نهاره

وكم في قصير البيت حشمه ومقدار =
لو جار فادمح له ولو به خساره

ترى النبي وصّى على الجار لو جار =
خذ الحذر ياعبيد عقب النذاره

رافق قويّ الدين حفّاظ الاسرار =
ينفعك في يوم(ن) يجي به كراره

ترى الهوى والغيّ هن شرّ الاشرار =
ومن داس عار الناس داسوا لعاره

جنّب رديّ الكار مافيه تعبار =
مافيه من فعل المناعير شاره

جنّب عنه خلّه لقصّاف الاعمار =
واحفظ وصاتي يارفيع المناره

واسلم ودم بالخير يا طير غيمار=
وصلّوا على المختار ما غار غاره


الشاعر/ تركي بن حميد
أمير قبيلة عتيبه