الشاعرين عبدالله ابن زويبن وعبدالله بن عون

قصيدة ورد بين الشاعرين عبدالله ابن زويبن وعبدالله بن عون:
قصيدة عبدالله بن زويبن
إن كان تنشد عن علومي وأنا صبيّ
أبتذكرها واعلمك عنها
لو هي بصفحاتٍ طواها الزمن طي
جرة مطر جاها عجاج ودفنها
ألعب طواريق الهوى مع هل الغي
اثقّل المعنى واخفف لحنها
والشعر يبقى في قلوب العرب حي
ولا كل من سوى القصيدة تكنها
وأنا احداها حدي الاصعاب بعصي
واقودها قود الاديب برسنها
والحب مردوده على صاحبه سي
كم ضحكة ونَات قلبي ثمنها
أذكر سنة تسعة وتسعين هجري
الف وثلاثمية بداية زمنها
زلت بي الاقدام للشمس من فيَ
اقدار والاقدار تومر وتنهى ّّ
غافل وجتني من كوت خافقي كي
كية عطب لولا طبيبٍ مكنها
أبعدت مضربها عن الصدر بيدي
ولدَّت على كبدي برمح طعنها
وعرفت ماتخفيه في صدرها لي
من واقع النظرات مني ومنها
نظرت فيها مثل نظراتها في
وعجزت اقاومها وصديت عنها
كل النسا ظلماوهي بينهن ضي
غطت شعاع الشمس أشعة بدنها
من الذهب تلبس خلاخيل وحلي
سود محاجرها وحمر وجنها
مدري تسمى من ومنين ومن أي
وش هي قبيلتها وموقع سكنها
راحت وانا ما اعرف من اخبارها شي
الا رموز الموتر اللي حضنها
مدينة من بين ابو ظبي ودبي
لعلها كاننها هي وطنها
تمطر عليها السحب هذي ورى ذي
وديم اليّا قفى ثراها ودنها
* *
رد الشاعر عبدالله بن عون:
ياحي عذب القيل ياحي ياحي
المهنة اللي قل من يمتهنها
اقفال ما يدخل على اسرارها عي
اللي يخبز السالفة ويعجنها
جواهرٍ قلبتها بين أيادي
وعجبت فاللي مع بعضها قرنها
واللي تبناها وموضوعها ني
واللي على افضل ما يناسب وزنها
جتني وانا غربي دراويش وهبي
في ديرة جعل الغشين ايغشنها
مثل الهنوف اللي عليها اجمل الزي
اللي مشاحن جيلها ما شحنها
حيث ان الاولى هي والفايزة هي
ولا قد وخذ عند المراهن رهنها
وعنها نشدني واحد من بنيخي
قلت انشدوا عنها مدير امخزنها
لابن زويبن فوقها طابع حيوي
كفي كتابة رمزها عن علنها
ولا ادري تسمى هند والا اسمها مي
والا تسمى باسمها اللي ضمنها
عند المواجه يوم حلت حوالي
حبيت منها مابدا من لدنها
ويوم المليحة حركت لي طواري
من حسن جوهرها وطيب امعدنها
نويت اجاريها لو اقدام رجلي
حفيا وهي يتعب مجارى ضعنها
ولديت اشوف اللي بقى في مخابي
واللي بوسمه صاحبي ما سجنها
وإلى سميي لاوٍ أرسانها لي
لين اذعنت له طايعة ما شطنها
طرايف من مآردٍ عذب ورهي
ما هو هماج كل كبدٍ وسنها
المآرد اللي يكتفى منه بشوي
مثل الدوا لا جا فتوقٍ وشنها
لا صار عذبٍ ماه ورهي ورخي
بصر العدود مهلكة من قطنها