أخفي بقلبي هم محد(ن) درى به = غير الضلوع اللي تزايد بها هموم
واقلبي اللي غارق(ن) في عذابه = بهمومه وحزنه غدا اليوم مكلوم
قلب العنا جرحه تزايد صوابه = هذا هو المحروم .. لا قيل محروم
في داخله عشق(ن) بأول شبابه = نبضات عشق(ن) خلت بقلبه رسوم
فيه الوفا والحب مثل السحابه = مثل السحاب اللي تغطى به نجوم
كثر الوفا بالقلب زاده صلابه = ما يعرف الغدرات لو قيل مظلوم
قلب(ن) صدوق(ن) كلمته يا هلابه = سماه من عقب الصفا زارها غيوم
لحن(ن) جميل(ن) مثل عزف الربابه = هذا النهار وتالي الليل بحلوم
هذي نهاية قلب يشكي صبابه = قلب(ن) مع الايام هايم ومغروم
حب(ن) مع الايام ياقف مهابه = محروم ياقلب(ن) غدا اليوم مرحوم
(الشاعره=عنود الغيد)