بعض الشباب ازداد حبه للاخبار=من يوم فالتلفاز طلت بثينه
لو كانت الاخبار زلزال وإعصار=وقتل ودمار وحرب ذل وغبينه
إن قلت حسوا قالوا ارتاح ومجار=من شأن عين اليوم تكرم مدينه
هذا هو الواقع ولو قيل ما صار=اقولها والحزن قلبي سجينه
بغداد تشكي من عنا الظلم والعار=والقدس في حكم اليهود اللعينه
وكشمير والشيشان في قصف وحصار=والدين من والاه ربي يعينه
وشبابنا لاهي تحت غزو الافكار=ضيع تقاليده ونهجه ودينه
ممتاز نمبر ون في سوبر ستار=وفالفن ونجوم العرب والرطينه
عقولهم قتلت مع سبق الاصرار=واللي قتلها كلنا عارفينه
يارب تقطع فالفضاء بث الاقمار=ما عاد نبغى البث زينه وشينه
لإننا ما ننتفع منه مقدار=ما نأخذ الا الشوك ونكب تينه
هبوا لنصر الدين يا نسل الاحرار=من شأن ما تغرق علينا السفينه
أجدادنا وصلوا بعيدات الامصار=وإيمانهم بأرواحهم محتمينه
علو شعار الحق في كل الاقطار=وصدق العقيده منهجٍ ناهجينه
اليوم قو الدين ماضي وتذكار=متى متى يرجع زمانه وحينه
اليا متى والدين في ذل وإصغار=اليا متى والدين ينزف جبينه
اليا متى بغداد في حكم كفار=اليا متى والقدس تصرخ رهينه
اليا متى نصبر على شرب الامرار=اليا متى نرضى الحياة المهينه
اليا متى وسلاحنا شجب وإنكار=اليا متى يأهل العقول الرزينه
قدامنا الجنه وصهيون للنار=بس الضمير الحي وينه ووينه
يا كثر ما نقرى مقالات وأشعار=لكن قلوب الناس غُلف متينه
إن كان لا همه ولا فعل مغوار=ثبت على التلفاز صورة بثينه