عهدي بها قـدّام تلبس : عبايه
.................. وأنا بعد قبل البس | شـماغ وعقال
طفلين , نتهجّى حـروف البدايه
.................. الله يا ما أجمل سـواليف الاطـفال
كانت لنـا في كل شـارع حكايه
.................. وكنّا نقـول علوم ما هيـب تنقال !
وكنت اتقاسـم ما معـاها معايه
.................. من عسـكريم التوت للعلك ابو ريال
وكانت بعكسي شاطره في القرايه
.................. تقـرأ جزء عـمّ وطـه والانفـااال
وأنا لك الله من مـواري غبايه :
.................. مدري ابو نقطـه هو : الذال او دال
وكانت لابويه تشتكي من شـقايه
.................. وتعلّمه كيـف اربط البـاب بـ حبال
ياما على ظهري كسر من عصايه
.................. يقـول لي : خلّك وأنا ابووك رجّال !
وامي تقـول : ادع لولدك الهدايه
.................. خوفي تصيـبه كثرة الضرب بـ هبال
لا شـفتها مع اول الدرب جايـه
.................. مدري أنا اللي ملت ولاّ الوطـا مال !
احـسّ قلبي يرتجف في حشـايه
.................. ما كنّـه الاّ الضيف لا هـزّ فنجـال
يـاما عن السّعلي تخبّت ورايـه
.................. لا خوفوها فيـه ثم شـافت ظـلااال
تقـول : خلّك يا مشـ ع ـل معـايه
.................. واسّـتأنس العب عندهااا دور الابطال
وآغار حتّى : من عيون اصدقايه
.................. لا طالعوها قلت : تكفون يا عيـال !!