-نفض الشــليل
قالوا ان البدو مبطي تحـــترم نفض الشــليل
بس انا اشوف الشليل اليوم محدٍِ ينفضه
طالت اقصر خلق ربـــي واندثر طول الطويل
وابتدى ( الحكي المبطن ) بين ناس مغرضـــــه
مانهبلت وضاق صدري لا وربـــي مستحيــل
مير ابكتب هالقصيده دام جتني معـرضـــــــــــــه
من هجوس الشاعر اللي طـــوول عمره مايعيل
غير منهو يبتليه ببعض هرج ويمرضـــــــــــــــه
كني اللي صرت قاتل عند اهل رجلٍ قتيل!!
وين مالدّ بعيونه شاف عينٍ تبغضـــــــــــه
لادليلٍ جا معاي .. ولا مع اخصامي .. دليل ..!!
طاح صبري مانهضته كيف غيري ينهضـــه
لو بشيل بوسط قلبي .. ياجماعه .. وش يشيل ؟
عجعجت فيه العلوج ولازم .. اكتب وانفضـــــه
ياعلوج الشعر .. ( هوّش ) لا كديش ولا أصيل
أو بلاش الشطر هذا ( حسن ذوقي ) يرفضــــه
غيرها ( ارزل ) .. لو بدوّر بس انا ماني رزيل
بارتفع باسلوب شعري لجل ناسٍ تحفظـــــــــــه
خابر اني .. لا زهمته .. جا .. قراحٍ سـلســبيل
والحلا .. يفرض حلاته دون محـدٍ يفرضــــــــه
وان بغيت اقول قلت .. ولا احترمت انظف شليل
دام مافي .. في زمان اليوم رجلٍ ينفضــــــــــه
/// خلف المشعان///-