القاف ترقص للبحر رقص الرجز ترمي الوشاح
فلت ضفايرها و تبي تنزل لقلبه و تسحره
والمعنى سارح في شعر شلال كنه الليل طاح
يرسل نسايم من نفل برياض جوري مزهرة
والقلب سامح مبتهج ترقص على نبضه الملاح
يعكس صور من ماستن بألوان طيفٍ مبهره
ياسيّدي عودك هنا نسهر معك حتى الصباح
يحلى السهر ويّا الوتر والليل ساري وتخبره
ماخذ معه حزن الليالي من بقايا أمس راح
ماخذ معه حزن الغريبه الخايفه من آخره
بحزم متاعي و راجعه يم الأمل لي مستراح
صدر الأمل مابه حزن به الف ليله مقمره
بفرد جناحي وراجعه ويّا الطيور اطوي الرياح
من يعذل طيور(ن) سرت يم الربوع المخضره
بين السما وبين العيون اللي هواها سحر لاح
به الف قصة وبينها العفو عند المقدره

الحب


الحب شوق وألم وآهات مغبونه
ويلات حزن ووله بقلوب مفتونه
تلقى المجنن على الاطلال يبكونه
وكلٍ يقلك حكايه عن بقايا انسان


والشوق ويل وسهر ودموع سكّابه
وان غاب خلك تروح تدقدق ابوابه
مير المصيبه اذا كل واحد بْلابه
تموت ليلى وقيسٍ ينبش الكثبان


والويل ويلاه ياويلي وويلي آه
كلن بهمه سرى وغاضب على دنياه
ياويل قلبي على اللي صرت انا ليلاه
بيعيش في دنيته هايم مدى الأزمان

يدق


يدق الباب وقليبي يدقدق
ياويلي من عيونك وش وراها


على قد العيون اللي تعلّق
عيونك مايعلقني سواها

أحس بشوقها الحارق يدفّق
لهايب تاخذ الروح لهواها

غموض البحر بعيونك يشوّق
ونار الشوق فيني من لظاها


هدبها يجذبك قاصد يغرّق
وانا ودي وابي اغرق معاها

وغرّب في شواطيها واشرّق
واعانق موجة الصبح ودفاها


وماهي بس عيونك يالمحقق
شفاتك تاخذ العقل بحلاها


كما حبة عنب احمر تبرّق
تحس الشوق ذايب في لماها


ولي ناظرتها ماقدر أدقق
اخاف النفس تغلبني بغواها


وصوتِك لا نشد كوني يورق
قبل ماتمطر الدنيا بسماها


لذا بطوي مراسيلك واطبّق
ولا بسأل عيونك وش وراها

هستريا الاشواق


الحكاوي انتهـت والحـزن فينـا
والسوالف هي سوالف كلها ارهاق


انتهي كل شي ترى راحت علينـا
والشقا باقي هنا عالـق بـالاوراق


والحقيقه تقـول ان احنـا نسينـا
قصة الأمس الحزينه بفجر الأشراق


ولا رجينـا لا ولا حـتى احترينا
عودة الماضي لنا من بعد الفـراق


ميـر حنـا يابعدهـم مـالقينـا
قلب صادق ممكن نْبادله لاشواق


ماهقيت القى رجل صادق يبينا
والحكايه كلها مب قصـه اذواق


والقدر ويّا الهـوى ماهـوبيدينـا
وان كتب ربي اكيد نصير عشّـاق


وان حصل قم استعد للـي يجينـا
الهوى أعذبه في هستريا الاشواق