محاوره جميله
 

الباب مقفول والـحارات مقفوله
... والناس مـاهي بمباديها وعـوايدها
وبالصدر جل الكلام ونعجز نقوله
... ومـا عـاد فيـها مقـاضيبٍ انجـودها
البعض هرجه يوازي عرضه وطوله
... ان قـال قـولٍ فـواتـيـره ايسـددها
والبعض الآخر مساريحه تجي حوله
... مـاعـنـده إلاّ قـثـاريـدٍ ايـقـثـردها
والطامـه ننـتخي نخـوات مجهوله
... نـوبٍ على وجـهها ونوبٍ انعصودها
والالسن اللي حكت بالحيل معسوله
... الله واعـلـم نــوايـاهـا ومــواردها
ماعـاد لمـع التنك يطغي على لوله
... وش عـاد لـو زبرقوا فيـها حدايدها
الـصح صح وكـلٍ يـجـني فـعـوله
... وضحـيـة الـمجـتمع كــلٍ يـقـوّدها
ماني وكيلٍ على الوادي ولاسيوله
... مـادام شـعـبانـها قـشة شـرايـدها
وانا اتـلاحق قـصيد وجولتي جوله
... اجيـب جـزل الـقـصايـد واتـعـمدها
.
فهيد العنزي
..............................
الباب مفتوح والحارات منزوله
والناس بيبانها محدن موصدها
عاداتها باقيه يا فهيد منقوله
لأجيالها القادمه باقي تعمدها
لكن ضعيف العقل ما يكسب الجوله
اجازة المنتهي بالحيل مددها
رسالة المجتمع للفكر مرسوله
الي عمل بأصلها والي يحددها
عقول متعلمه وعقول مشلوله
وكلن حسب رغبته يبني مقاصدها
صدور متعافيه وصدور معلوله
الطيبه بينه وشلون نجحدها
طروش بعض العرب ما تبعد الحوله
ناس تقفي بها وناس تعودها
ولو كان طب البدو ما فاد مفعوله
الكيه المحكمه لازم توسدها
والي يعرف التنك ما يعرف اللوله
له خبرة بالمعادن يوم يفردها
هذي ردود القصيده يا رع الطوله
واذا تبي غيرها يا فهيد بنقدها


فهد حربي

رد: محاوره جميله