يارحيل ياابن جديع برسلك ارماس=يومك تدور لي علوم ومراميس
ونيت ونه من خوى الراس بالراس=منها القلم يبكي وتندب قراطيس
الوضع حاس وحاس في وضعي الحاس=لا انس وانسى من نسوني الموانيس
تكردسوا ناسي لطعني بالأدماس=برق العيون مفرقين الضواريس
شف ذا دحل عمري مغثرب ومحتاس=عرقوا على كبدي طوال النسانيس
الخاز باز الخرز في ليل خنداس=قرناس وجه البوم وربعه قرانيس
مافي ذبيل اقول لاباس لاباس= لاصرت تاحي ولا عليه ملابيس
الناس تسعد كل ماهب نسناس=وانا يكدرني هبوب النسانيس
يطري علي الصيف بالليل جلاس=مع ربع جمعتهم تغث المناحيس
والقوري مركد على صر منداس=ولا على القيصوم لأجل المعاطيس
لياشربت الكاس يعطي فعل كاس=أهل الكنايس تابعين القواسيس
ويطري علي خرعوب من بدة الناس=ضحضاح عشقي بنت ناسٍ نواميس
من يوم مغباشي وأنا اعيش بإحساس=والله لطهج واقعي بالأحاسيس
وأصير ريس كل من راس ونراس=سماهري شعري وشعري متاريس
العام مثل كليب والناس جساس=واليوم شفني زير حرب البسابيس
ضحضاح حلمي يالخوي صار هنداس=في زول سيد الخفر سقم الطواويس
عطبول نهده فقع من غرب مكناس=والشعر عاشوراء في مقبرة ويس
وخدارتها شبراق من خلفها باس=ضي الوجن ناظر عيوني المداميس
من خصرها رسلان صمم من نحاس=دلات ماناشت يدين الهداريس
قولوا لمن يبغاه ابشر بالأفلاس=شطار قبلك حاولوا بس مفاليس
يارحيل ابن جديع ذا موجز ارماس=بيتٍ بقوله هو اختام المراميس
الحظ عجه واقرب الناس قرطاس=يالله يذكرني بقايا القراطيس